ഓസീസ് ടീം ബസിനു നേരെ ഉണ്ടായ ആക്രമണം അപമാനകരമെന്ന് ഇന്ത്യൻ വനിതാ ക്രിക്കറ്റ് ടീം ക്യാപ്റ്റൻ മിതാലി രാജ്. എന്ത് മത്സരമായിരുന്നാലും ജയവും പരാജയവും സാധാരണമാണ്. ജയപരാജയങ്ങളെ സ്പോർട്സ്മാൻ സ്പിരിറ്റിൽ കാണണമെന്നും അതിവൈകാരികതയോടെ മത്സരങ്ങളെ സമീപിക്കരുതെന്നും മിതാലി പറഞ്ഞു.

ബസിനു നേരെ ഉണ്ടായ കല്ലേറ് രാജ്യത്തെ കായിക രംഗത്തിനു തന്നെ അപമാനമാണെന്ന് മിതാലി പ്രതികരിച്ചു. ചൊവ്വാഴ്ച ഗോഹട്ടിയിൽ നടന്ന, ഇന്ത്യ-ഓസ്ട്രേലിയ ട്വന്‍റി-20 പരമ്പരയിലെ രണ്ടാം മത്സരത്തിനു ശേഷം മടങ്ങവേയാണ് ഓസീസ് ടീം അംഗങ്ങൾ സഞ്ചരിച്ച ബസിനു നേരെ കല്ലേറുണ്ടായത്. മത്സരത്തിൽ ഓസീസ് ഇന്ത്യയെ എട്ടു വിക്കറ്റിന് പരാജയപ്പെടുത്തിയിരുന്നു. ഓസ്ട്രേലിയൻ ബാറ്റ്സ്മാൻ ആരോൺ ഫിഞ്ചാണ് ബസിന്‍റെ ഗ്ലാസുകൾ കല്ലേറിൽ തകർന്ന വിവരം ട്വിറ്ററിലൂടെ പങ്കുവച്ചത്.

രണ്ടു മാസത്തിനിടെ ഇത് രണ്ടാം തവണയാണ് ഓസീസ് ടീം ബസിനു നേരെ കല്ലേറുണ്ടാകുന്നത്. സെപ്റ്റംബറിൽ ബംഗ്ലാദേശിനെതിരായ മത്സരം കഴിഞ്ഞ് മടങ്ങുന്നതിനിടെ ചിറ്റഗോംഗിൽ വച്ചും ആക്രമണമുണ്ടായിരുന്നു.