ആൺകുഞ്ഞിനെ പ്രതീക്ഷിച്ചിരുന്ന ദമ്പതികൾക്ക് ജനിച്ചത് പെൺകുഞ്ഞായിരുന്നു. അതിൽ അരിശം തോന്നിയ ദമ്പതികൾ കുഞ്ഞിനോട് കാട്ടിയത് കൊടുംക്രൂരതയും. ഒടുവിൽ വെറും ആറുദിവസം മാത്രം പ്രായമുള്ള കുഞ്ഞ് മരിച്ചു. ഝലവാറിലെ തൊബാറിയ ഗ്രാമത്തിൽ നിന്നുള്ള വീരം ലാൽ (40), ഭാര്യ സോറം ബായി(35) എന്നിവരാണ്​ പിഞ്ചുകുഞ്ഞിനോട്​ ക്രൂരത കാണിച്ചത്​.

വീരം ലാലിനും ഭാര്യ സോറത്തിനും അഞ്ച് ആൺമക്കളുണ്ട്. എന്നിട്ടും അവർ പിന്നെയും ആശിച്ചത് ആൺകുഞ്ഞിനെയായിരുന്നു. ഒക്​ടോബർ നാലിനാണ്​ സർക്കാർ ആശുപത്രിയിൽ സോറം പെൺകുഞ്ഞിന് ജൻമം നൽകിയത്. പ്രസവം കഴിഞ്ഞ് ആറു ദിവസങ്ങൾക്ക്​ ശേഷം ആശുപത്രിയിൽ നിന്ന്​ ഡിസ്​ചാർജ്​ ആയി വീട്ടിലേക്ക്​ പോകുന്ന വഴിയിൽ ആളൊഴിഞ്ഞ ഒരു പ്രദേശത്ത് കുഞ്ഞിനെ ഇവർ ഉപേക്ഷിക്കുകയായിരുന്നു. ഉപേക്ഷിച്ച സമയത്ത് കുഞ്ഞിന്റെ ദേഹത്ത് നിറയെ കല്ലുകൾ വാരിക്കൂട്ടി വയ്ക്കുകയും ചെയ്തു. ഈ സമയത്ത് സമീപപ്രദേശത്തെ ഒരു കുട്ടി ഇത് കാണുകയും നാട്ടുകാരെ വിവരമറിയിക്കുകയും ചെയ്തു. തുടർന്ന് നാട്ടുകാർ കുഞ്ഞിനെ ആശുപത്രിയിലെത്തിച്ചെങ്കിലും രക്ഷിക്കാനായില്ല. സംഭവത്തിൽ ദമ്പതികളെ പോലീസ് അറസ്റ് ചെയ്തു.