ജൈവ വൈവിധ്യ പാര്‍ക്ക് ഉദ്ഘാടനം ചെയ്യാനെത്തിയ മന്ത്രിയെ തേനീച്ചക്കൂട്ടം ഓടിച്ചിട്ടു കുത്തി. കര്‍ണാടക വനം മന്ത്രി രാമനാഥ റായ്ക്കാണ് അപ്രതീക്ഷമായ ആക്രമണം നേരിടേണ്ടി വന്നത്. ബെലഗാവി വിശ്വേശ്വരയ്യ സാങ്കേതിക സര്‍വകലാശാലയില്‍ വച്ചാണ് സംഭവം.

കര്‍ണാടക വനംമന്ത്രി രാമനാഥ് റായും എംപി സുരേഷ് അങ്കടിയും ഉദ്യോഗസ്ഥരും നാട്ടുകാരും സ്‌കൂള്‍ കുട്ടികളും പരിപാടിയില്‍ സംബന്ധിച്ചിരുന്നു.

എംപി സുരേഷ് അധ്യക്ഷ പ്രസംഗം നടത്തുന്നതിനിടെ സദസ്സിലുള്ളവര്‍ ഓടാന്‍ തുടങ്ങിയപ്പോഴും മനസിലാകാതിരുന്ന മന്ത്രിയ്ക്കും ഉദ്യോഗസ്ഥര്‍ക്കും കുത്ത് കിട്ടി തുടങ്ങിയപ്പോഴാണ് സംഭവം തേനീച്ചയുടെ ആക്രമണമാണെന്ന് മനസിലാകുന്നത്. മന്ത്രിയ്ക്ക് മുഖത്ത് കുത്ത് കിട്ടിയതോടെ പരിപാടി നടക്കുന്നിടത്ത് കൂട്ടയോട്ടത്തിന് തുടക്കമായി.

തേനീച്ചയുടെ കുത്തേറ്റ റേഞ്ച് ഫോറസ്റ്റ് ഓഫീസറെയും കണ്‍സര്‍വേറ്ററെയും ആശുപത്രിയില്‍ പ്രവേശിപ്പിച്ചു. തുറസ്സായ സ്ഥലത്തായിരുന്നു പരിപാടി. തേനീച്ചക്കൂട്ടം ഇളകാനിടയാക്കിയത് പരിപാടി ചിത്രീകരിക്കാന്‍ ഉപയോഗിച്ചിരുന്ന ഡ്രോണ്‍ ക്യാമറ തന്നെയായിരുന്നു. പറന്നു പറന്ന് തേനീച്ചകൂട്ടില്‍ തട്ടിയതോടെ കൂട്ടം ഇളകി മന്ത്രിയെയും കൂട്ടരെയും ഓടിച്ചിട്ടു കുത്തുകയായിരുന്നു.