കല്യാണം കഴിഞ്ഞ് അഞ്ചാം നാള്‍ നവവധുവും വരനും വാഹനാപകടത്തില്‍ കൊല്ലപ്പെട്ടു. ബിഹാറിലെ പട്‌നഗയ ദേശിയ പാതയിലാണ് ഇവര്‍ സഞ്ചരിച്ച കാര്‍ ഒരു ട്രക്കുമായി കൂട്ടിയിടിച്ച് ഇരുവരും മരണമടഞ്ഞത്. 

23 വയസ്സുള്ള മോനി.ഭര്‍ത്താവ് മധുമേഹ് കുമാര്‍ എന്നിവരാണ് മരണമടഞ്ഞത്.വെള്ളിയാഴ്ച രാത്രിയായിരുന്നു ദാരുണമായ സംഭവം അരങ്ങേറിയത്. മോനിയുടെ സഹോദരനും ഭാര്യയും മറ്റൊരു കാറില്‍ ഇവരെ അനുഗമിക്കുന്നുണ്ടായിരുന്നു. കഴിഞ്ഞ നവംബര്‍ 20 നാണ് ഇവരുടെ വിവാഹം നടന്നത്. വിവാഹത്തിന് ശേഷം തന്റെ സ്വന്തം വീട്ടിലേക്ക് പോയതായിരുന്നു മോനിയും ഭര്‍ത്താവും.

ഭര്‍തൃഗൃഹത്തിലേക്ക് തിരിച്ച് വരും വഴിയാണ് അപകടം ഉണ്ടായത്. എതിര്‍ദിശയില്‍ വന്ന ട്രക്കിനടിയിലേക്ക് ഇവര്‍ സഞ്ചരിച്ച കാര്‍ ഇടിച്ചു കയറുകയായിരുന്നു. ഗുരുതരമായി പരിക്കേറ്റ മോനി സംഭവ സ്ഥലത്തി വെച്ച് തന്നെ മരിച്ചു. ആശുപത്രിയില്‍ എത്തിക്കും വഴിയാണ് മധുമേഹ് മരണമടഞ്ഞത്.