പാർലമെന്റിന്റെ ശീതകാല സമ്മേളനത്തിൽ ആദ്യ ദിനം തന്നെ സഭ ബഹളത്തിൽ മുങ്ങി. പ്രധാനമന്ത്രിയുടെ പാക് പരാമര്‍ശത്തില്‍ മാപ്പ് പറയണമെന്ന് ആവശ്യപ്പെട്ട് പ്രതിപക്ഷം ബഹളം വച്ചു. തുടർന്ന് സഭാനടപടികള്‍ നിർത്തി സഭ ഇന്നത്തേക്ക് പിരിഞ്ഞു. സമ്മേളനത്തിന്റെ തുടക്കം മുതലേ പ്രതിപക്ഷം പ്രതിഷേധം ആരംഭിച്ചിരുന്നു. ഇതോടെ സഭ 20 മിനിറ്റു നേരത്തേക്കു പിരിഞ്ഞിരുന്നു. വീണ്ടും സഭ ചേര്‍ന്നെങ്കിലും പ്രതിഷേധം തുടര്‍ന്നു.

പാക്കിസ്ഥാനുമായി ചേർന്ന് ഗുജറാത്ത് തിരഞ്ഞെടുപ്പ് അട്ടിമറിക്കാൻ മൻമോഹൻ സിങ് പദ്ധതിയിട്ടുവെന്ന ആരോപണം പിൻവലിച്ച് പ്രധാനമന്ത്രി മാപ്പുപറയണമെന്നാവശ്യപ്പെട്ട് പ്രതിപക്ഷം നോട്ടിസ് നൽകിയിരുന്നു. എന്നാൽ ഇതു തള്ളിയതിനെത്തുടർന്നായിരുന്നു പ്രതിഷേധം. മോദിയുടെ പ്രസ്താവന നിർഭാഗ്യകരമാണെന്നും തങ്ങൾ നല്‍കിയ നോട്ടിസ് തള്ളിയ രാജ്യസഭ അധ്യക്ഷൻ വെങ്കയ്യ നായിഡുവിന്റെ നടപടി ശരിയായില്ലെന്നും പ്രതിപക്ഷാംഗങ്ങൾ പറഞ്ഞു.