മദ്യലഹരിയിൽ അമ്മയെയും അച്ഛനെയും കൊന്ന യുവാവ് ആത്മഹത്യ ചെയ്യാനുള്ള ശ്രമത്തിനിടെ ഉറങ്ങിപ്പോയി. മുംബൈയിലാണ് സംഭവം. എൻജിനിയറിംഗ് ബിരുദധാരിയായ കൃഷ്ണസാഗർ എന്ന യുവാവാണ് മാതാപിതാക്കളോട് ഈ ക്രൂരത കാട്ടിയത്.

തൊഴിൽരഹിതനായ കൃഷ്ണസാഗർ തികഞ്ഞ മദ്യപാനിയായിരുന്നു. കൊലപാതകം നടക്കുന്നതിന്റെ തലെന്നും ഇയാൾ മദ്യപിച്ച് കെട്ടാണ് വീട്ടിലെത്തിയത്. കുടുംബ വീട്ടിൽ മാതാപിതാക്കൾക്കും സഹോദരനുമൊപ്പമാണ് ഇയാൾ കഴിഞ്ഞിരുന്നത്. മദ്യലഹരിയിലായിരുന്നു കൊലപാതകങ്ങളും. സംഭവത്തിന് തലേദിവസവും മാതാപിതാക്കളുമായി വഴക്കിട്ടിരുന്നു. ഇതിന്റെ ദേഷ്യത്തിലായിരുന്നു കൊലപാതകങ്ങൾ.

അച്ഛനെ ഗ്ലാസ് കഷ്ണം കൊണ്ട് കഴുത്തറുത്തും അമ്മയെ കഴുത്തു ഞെരിച്ചുമായിരുന്നു കൊന്നത്. തുടർന്ന് അടുത്ത മുറിയിലെത്തി കൈ ഞരമ്പ് മുറിച്ച് ജീവനൊടുക്കാനായിരുന്നു പദ്ധതി. ഇതിനിടയിൽ ഉറങ്ങിപ്പോവുകയായിരുന്നു. നേരം വെളുത്തിട്ടും ഭർത്താവിന്റെ അച്ഛനും അമ്മയും ഉണരാത്തതിൽ സംശയം തോന്നി കൃഷ്ണസാഗറിന്റെ സഹോദര ഭാര്യ നടത്തിയ അന്വേഷണത്തിലാണ് ഇരുവരെയും മരിച്ച നിലയിൽ കണ്ടത്.

ഉടൻ ഭർത്താവിനെ വിവരമറിയിച്ചു. ഇതിനിടയിലാണ് മറ്റൊരു മുറിയിൽ കൈയിലെ മുറിവുമായി ഉറങ്ങുന്ന കൃഷ്ണസാഗറിനെ കണ്ടത്. സംഭവമറിഞ്ഞ് നാട്ടുകാരും പൊലീസും എത്തുമ്പോഴും നല്ല ഉറക്കത്തിലായിരുന്നു ഇയാൾ. പൊലീസ് കസ്റ്റഡിയിലെടുത്ത് ചോദ്യം ചെയ്തതോടെ ഇയാൾ എല്ലാം ഏറ്റുപറയുകയും ചെയ്തു.