ആശുപത്രി മുറിയില്‍ പൂര്‍ണ്ണ ഗര്‍ഭിണിയുടെ നൃത്തം; കേരളത്തിലെ യുവതികളും മാറി ചിന്തിച്ചുതുടങ്ങിയിരിക്കുന്നു!
ഭര്‍ത്താവും വീട്ടുകാരും ആകാംക്ഷയുടെ മുള്‍മുനയില്‍ നില്‍ക്കുന്ന സമയമാണ് പ്രവസസമയം അടുത്ത ഗര്‍ഭിണികള്‍ ഒപ്പമുള്ള സമയം.
എന്നാല്‍ പ്രസവത്തിന് തൊട്ടുതലേ ദിവസം പൂര്‍ണ്ണഗര്‍ഭവതിയായ യുവതി നൃത്തം ചെയ്യാനൊരുങ്ങിയാലോ? അയ്യോ പിറക്കാനിരിക്കുന്ന കുഞ്ഞിന് പ്രശ്‌നങ്ങളെന്തെങ്കിലും വരുത്തിവയ്ക്കാനാണോ ഭാവം എന്നു പറഞ്ഞ് മുതിര്‍ന്നവര്‍ അപ്പോഴേയ്ക്കും വിലക്കുകളുമായി എത്തിയിരിക്കും.
പാശ്ചാത്യനാടുകളില്‍ ഒക്കെ ഇത് ഏറെക്കുറെ സാധാരണമാണെങ്കിലും കേരളത്തില്‍, ആ സമയത്തെ നൃത്തത്തിന് അത്ര സ്വീകാര്യതയൊന്നും ആയിട്ടില്ല. അതുകൊണ്ടാണ് ഒരു വീഡിയോ ഇതിനകം തന്നെ സമൂഹമാധ്യമങ്ങളില്‍ തരംഗമായത്. രണ്ടുമാസം മുമ്പെടുത്ത വീഡിയോയാണ് ഇപ്പോള്‍ വൈറലായിരിക്കുന്നത്. പ്രസവത്തിനായി പ്രവേശിപ്പിച്ച ആശുപത്രി മുറിയില്‍ പ്രസവത്തലേന്ന് നൃത്തം ചെയ്താണ് കോഴിക്കോട് ചേവരമ്പലം സ്വദേശി സ്വാതി കൃഷ്ണ ശ്രദ്ധ നേടിയത്.
നൃത്തം ചെയ്യണമെങ്കില്‍ ചെയ്‌തോളൂ എന്ന ഡോക്ടറുടെ വാക്കായിരുന്നു ആശുപത്രി മുറിയില്‍ നാലര മിനിറ്റ് നൃത്തം ചെയ്യാന്‍ ധൈര്യം നല്‍കിയത് എന്നാണ് നൃത്താധ്യാപിക കൂടിയായ സ്വാതി പറയുന്നത്. മകളുടെ ആഗ്രഹത്തെ പേടിയോടെ പിന്തുണച്ച അമ്മ തന്നെയാണ് നൃത്തം മൊബൈലില്‍ ചിത്രീകരിച്ചതും. ഗര്‍ഭകാലത്ത് മൂന്നാം മാസം വരെ സ്വാതി നൃത്തം ചെയ്തിരുന്നു. പുതുതായി എത്തിയ അതിഥി മകളായതിനാല്‍ അവളേയും നര്‍ത്തകിയാക്കാമല്ലോ എന്ന സന്തോഷത്തിലാണ് ഇപ്പോള്‍ സ്വാതി.
https://www.facebook.com/Malayalivartha
