കേരളത്തില്‍ ഇത്തവണ ഓണസദ്യ വിളമ്പാന്‍ റോബോട്ടുകളും ഉണ്ടാവും!
തമിഴ് സൂപ്പര്‍സ്റ്റാര്‍ രജനീകാന്ത് അരങ്ങുതകര്‍ത്ത യന്തിരന്‍ എന്ന റോബോട്ട് ഉണ്ടാക്കിയ പൊല്ലാപ്പുകളും അത്ഭുതങ്ങളുമെല്ലാം നാം കണ്‍കുളിര്‍ക്കെ കണ്ടതാണ്. ഇതാ കേരളത്തിലാദ്യമായി ഓണാഘോഷത്തിനു സദ്യ വിളമ്പാനായി ഒരു റോബോട്ട് എത്തുന്നു.
ഷൊര്‍ണൂര്‍ റോഡിലെ സുഹര്‍ഷ ടവറിലെ നാലാംനിലയില്‍ പ്രവര്‍ത്തിക്കുന്ന ഇന്‍കര്‍ റോബോട്ടിക്‌സ് സൊല്യൂഷന്‍സ് പ്രൈവറ്റ് ലിമിറ്റഡിന്റെ ഓണാഘോഷ പരിപാടിയില്‍ ആകാംക്ഷയുടെയും ആശ്ചര്യത്തിന്റേയും ചെറിയ ഓണസദ്യയുമായാണ് നമ്മുടെ യന്തിരന്റെ വരവ്. അവര്‍തന്നെ വികസിപ്പിച്ചെടുത്ത ഒരു യന്തിരനായിരിക്കും ഇത്തവണ സദ്യ വിളമ്പുക. നാലു യുവാക്കളുടെ സംരംഭമാണ് ഇന്‍കര്‍ റോബോട്ടിക്‌സ്.
ലോകമെമ്പാടും വ്യാപിച്ചുകൊണ്ടിരിക്കുന്ന റോബോട്ടിക്‌സിന്റെ അനന്തസാധ്യത പൊതുജനത്തെ മനസിലാക്കിക്കൊടുക്കുക എന്നതാണ് ഈ സദ്യ വിളമ്പലിലൂടെ അണിയറക്കാര്‍ ലക്ഷ്യമിടുന്നത്. അടുത്തകാലത്ത് തൃശൂരില്‍ തുടങ്ങിയ ഒരു സൂപ്പര്‍ മാര്‍ക്കറ്റില്‍ അതിഥികള്‍ക്കു മിഠായി നല്‍കി സ്വീകരിക്കുവാന്‍ ഈ റോബോട്ടുണ്ടായിരുന്നു. ഇനിമുതല്‍ ഇതേ സൂപ്പര്‍മാര്‍ക്കറ്റില്‍ ഐസ്‌ക്രീം എടുത്തുനല്കുന്നതും ഇതേ റോബോട്ടായിരിക്കും.
കേരളത്തിലെ ആദ്യത്തെ റോബോട്ടിക്‌സ് പ്ലേഗ്രൗണ്ടും ഇന്‍കര്‍ റോബോട്ടിക്‌സില്‍ ഒരുക്കിയിട്ടുണ്ട്. ഈമാസം ഏഴ്, എട്ട് തീയതികളിലാണ് പ്ലേഗ്രൗണ്ട് സൗകര്യം ഒരുക്കിയിട്ടുള്ളത്. വിവിധ തരം റോബോട്ടുകളുമായി മൂന്നുമണിക്കൂര്‍ നേരം സംവദിക്കാനും കളിക്കാനും ഇതിലൂടെ സാധിക്കും.
ഹ്യുമനോയ്ഡ് റോബോട്ടുകള്‍ മുതല്‍ കുഞ്ഞന്‍ റോബോട്ടുകളായ സ്‌പെറിക്കല്‍ റോബോട്ടുകള്‍ വരെ ഇവിടെ സജ്ജമാക്കിയിട്ടുണ്ട്. നൂതന സാങ്കേതികവിദ്യയായ വിര്‍ച്വല്‍ റിയാലിറ്റി നേരിട്ട് അനുഭവിച്ചറിയുകയും ചെയ്യാം. കളികളിലൂടെ റോബോട്ടിക്‌സ് പഠനമാണ് ഈ സംരംഭത്തിലൂടെ ഇന്‍കര്‍ റോബോട്ടിക്‌സ് ലക്ഷ്യമിടുന്നത്.
https://www.facebook.com/Malayalivartha
