അമേരിക്കയിലെ യൂട്ടായിലുള്ള സബ്വേ ഫാസ്റ്റ് ഫുഡ് റസ്റ്ററന്റിലെ സാന്‍വിച്ച് മേക്കറായിരുന്നു 1997-ല്‍ പതിനേഴുകാരനായിരുന്ന ജോര്‍ദാന്‍ ഓള്‍സെന്‍. ആ സബ്വേയില്‍ സാന്‍വിച്ച് ഉണ്ടാക്കാന്‍ മറ്റൊരാളെത്തി. ജെന്നിഫര്‍ എന്ന യുവതി. ഇരുവരും തമ്മില്‍ പ്രണയത്തിലായി.

ജോര്‍ദാന്‍ രണ്ടു വര്‍ഷത്തിനു ശേഷം സൈന്യത്തില്‍ ചേര്‍ന്നു. ജെന്നിഫര്‍ സ്വന്തം നാടായ ഐഡഹോയിലേക്കും പോയി. 2002-ല്‍ ഇരുവരും വിവാഹിതരായി. എന്നാല്‍ ഇരുവരും യൂട്ടായിലെത്തി താമസം ആരംഭിച്ചു. ഇതോടെ തങ്ങള്‍ നേരത്തെ ജോലി ചെയ്തിരുന്ന സബ്വേയില്‍ ഇരുവരും ഒന്നിച്ചെത്തി മധുരസ്മരണകള്‍ അയവിറക്കി.

വല്ലപ്പോഴുമുള്ള അത്തരം സന്ദര്‍ശനത്തിനിടെയാണ് സബ്വേ വില്‍ക്കാനുള്ള നീക്കത്തെക്കുറിച്ച് ജോര്‍ദാന്‍ അറിഞ്ഞത്. ഇതോടെ ജെന്നിഫറുമായി ആലോചിച്ച് ബാങ്ക് വായ്പയും മറ്റും സംഘടിപ്പിച്ച് ഇരുവരും ചേര്‍ന്ന് സബ്വേ വാങ്ങുകയായിരുന്നു. ഇരുവരും തങ്ങളുടെ പ്രണയത്തിന്റെ ഓര്‍മയ്ക്കായാണ് സബ്വേ സ്വന്തമാക്കിയത്. ജെന്നിഫറാണ് സബ്വേയുടെ മാനേജര്‍.

സബ്വേയുടെ നടത്തിപ്പും മൂന്നു കുട്ടികളുടെ കാര്യവും ഒരുപോലെ കൊണ്ടുപോകാനാകുന്നതിന്റെ സന്തോഷത്തിലാണ് ജെന്നിഫര്‍. നേരത്തെ വീട്ടില്‍ നിന്ന് ഇറങ്ങണമെങ്കിലും കുട്ടികള്‍ സ്‌കൂളില്‍ നിന്ന് മടങ്ങിയെത്തുന്നതിന് മുമ്പ്് സബ്വേയില്‍ നിന്ന് എത്താന്‍ പറ്റും. മാത്രമല്ല ഇഷ്ടമുള്ള ജോലി ചെയ്യുന്നതിന്റെ സന്തോഷം വേറെയും- ജെന്നിഫര്‍ പറയുന്നു.

2019 ഡിസംബര്‍ 30-നു തുടങ്ങി 2020 ജനുവരി നാലുവരെ നീണ്ടുനില്‍ക്കുന്ന ഗ്രാന്‍ഡ് റീഓപ്പണിംഗ് പരിപാടിയിലൂടെ കച്ചവടം ഗംഭീരമാക്കുകയാണ് ജോര്‍ദാന്‍.