മരടിലെ ഹോളിഫെയ്ത്ത് ഫ്‌ളാറ്റിനു സമീപം അത്തിമരക്കൊമ്പില്‍ കൂടുകൂട്ടിയ കാക്കക്കുഞ്ഞ് ഇന്ന് ജയശ്രിയുടെ പൊന്‍കുഞ്ഞ്. കൂട്ടിലെ കാക്കകളുടെ നിസ്സഹായത പറഞ്ഞ ന്യൂസ് കണ്ട ജയശ്രി സ്‌ഫോടനത്തലേന്ന് തന്നെ കുഞ്ഞിനെ കൂടോടെ ഏറ്റെടുത്തു. ഹോളിഫെയ്ത്തിന്റെ ഓര്‍മയ്ക്കായി കാക്കക്കുഞ്ഞിന് ഹോളിയെന്ന് പേരും നല്‍കി.

ഈ കോണ്‍ക്രീറ്റ് സൗധത്തിനരികിലെ അത്തിമരക്കൊമ്പില്‍ കുഞ്ഞു ജീവന്‍ തുടിക്കുന്ന കൂടൊരെണ്ണമുണ്ടായിരുന്നു. ഹോളി ഫെയ്ത് പൊളിക്കുന്നതിന്റെ തലേന്നവിടെയെത്തിയ മാധ്യമപ്രവര്‍ത്തകരുടെ ക്യാമറയില്‍ ആ കൂടും അതിലെ ജീവനും പതിഞ്ഞിരുന്നു.

ഫ്‌ലാറ്റ് പൊളിക്കുന്നതിനൊപ്പം ഈ കുഞ്ഞുകിളിക്കൂടും തകര്‍ന്നു പോകുമോയെന്ന പേടി പ്രേക്ഷകരുമായി വാര്‍ത്താ ടീം പങ്കുവച്ചിരുന്നു. മറ്റ് കിളികള്‍ക്കെല്ലാം കൂടുപേക്ഷിച്ച് പോകേണ്ടി വന്നപ്പോള്‍ വിധിക്കു വിട്ടു കൊടുക്കാതെ ഈ കുഞ്ഞുജീവനെ കാക്കാന്‍ ജയശ്രീയെന്ന വീട്ടമ്മ തീരുമാനിച്ചു.

ഇന്ന് ജയശ്രീ ഹോളിക്കുഞ്ഞിന്റെ കൂടി അമ്മയാണ്. ഈ വീട്ടിലുളളവരെല്ലാം കുടുംബാംഗങ്ങളും. ഹോളിക്കുഞ്ഞിനെ അന്നമൂട്ടാനും, സുരക്ഷിതയായി സൂക്ഷിക്കാനുമെല്ലാം കണ്ണുചിമ്മാതെ കൂടെയിരിക്കുകയാണീ കുടുംബം.