പ്രണയാര്ദ്രനിമിഷത്തിന്റെ വൈകാരികത ചോര്ത്തിക്കള ഞ്ഞെങ്കിലും, വിവാഹാഭ്യര്ഥന നടത്തുന്നതിനിടെ ഉണ്ടായ അപകടം ചിരി ഉണര്ത്തുന്ന ഓര്മ്മയായി തുടരും!
ന്യൂയോര്ക്കിലെ ബ്രൂക്ക്ലിന് പാലത്തില് വച്ചു നടന്ന ഒരു വിവാഹാഭ്യര്ഥന സമൂഹമാധ്യമങ്ങളില് വൈറലായി. വിവാഹാഭ്യര്ഥനാവേളയില് ഇവിടെ നടന്ന ഒരു അപകടമാണ് ഈ നിമിഷത്തെ ശ്രദ്ധേയമാക്കിയത്.
ന്യൂയോര്ക്കിലെ ബ്രൂക്ക്ലിന് പാലത്തില് വച്ചു വിവാഹാഭ്യര്ഥന നടത്തി തന്റെ പ്രിയതമയെ അദ്ഭുതപ്പെടുത്താനാണ് ക്രിസ് എന്ന യുവാവ് ശ്രമിച്ചത്. എന്നാല് ആ നിമിഷത്തിനെ ആര്ദ്രമാക്കി കവിഞ്ഞൊഴുകിയ പ്രണയത്തില് നിന്നും ശ്രദ്ധ പൂര്ണ്ണമായും കവര്ന്നെടുത്തത് ഒരു സൈക്കിള് യാത്രികനായിരുന്നു. വിവാഹാഭ്യര്ഥനയുടെ ചിത്രങ്ങള് പകര്ത്താന് ഏര്പ്പെടുത്തിയ ഫൊട്ടോഗ്രഫറുടെമേല് തട്ടി പാലത്തിലൂടെ വരികയായിരുന്ന ആ സൈക്കിള് യാത്രികന് വീഴുകയായിരുന്നു.
പ്രണയാര്ദ്രമായി മുട്ടുകുത്തി നിന്ന് ക്രിസ് വിവാഹാഭ്യര്ഥന നടത്തുന്നതിന് ഇടയിലാണ് അപകടം. നിലത്തു വീണ യാത്രികനും ഫൊട്ടോഗ്രഫറും വേഗം എണീറ്റു. സംഭവത്തില് ക്രിസ് ആദ്യമൊന്നു പകച്ചു. തുടര്ന്ന് ഇരുവരോടും കുഴപ്പമൊന്നുമില്ലല്ലോ എന്നു ചോദിച്ചു. എന്നാല് ഇതു കണ്ട് ചിരിയ്ക്കാന് തുടങ്ങിയ കാമുകിയ്ക്ക് അത് നിയന്ത്രിക്കാനേ കഴിഞ്ഞില്ല. ആ ചിരി അവരുടെ ജീവിതത്തില് എന്നും നിറഞ്ഞുനില്ക്കുമെന്ന് നമുക്ക് പ്രതീക്ഷിക്കാം.
https://www.facebook.com/Malayalivartha
