അനില്‍ കുംബ്ലെയ്ക്ക് ഇന്ത്യയില്‍നിന്നു തന്നെ ഒരു പിന്‍ഗാമി. 19 വയസ്സില്‍ താഴെയുള്ളവര്‍ക്കായി നടത്തുന്ന കൂച്ച് ബിഹര്‍ ട്രോഫിയില്‍ മണിപ്പൂരി താരം റെക്‌സ് രാജ്കുമാര്‍ സിങ്ങാണ് ഒരു ഇന്നിങ്‌സിലെ 10 വിക്കറ്റും വീഴ്ത്തിയത്. അരുണാചല്‍ പ്രദേശിനെതിരായ മല്‍സരത്തിലാണ് സിങ്ങിന്റെ ചരിത്രനേട്ടം. റെക്‌സ് സിങ്ങിന്റെ അതുല്യപ്രകടനത്തിന്റെ കരുത്തില്‍ മണിപ്പൂര്‍ അരുണാചലിനെതിരെ 10 വിക്കറ്റ് ജയം നേടി.

അരുണാചലിന്റെ രണ്ടാം ഇന്നിങ്‌സില്‍ 9.5 ഓവറില്‍ 11 റണ്‍സ് മാത്രം വഴങ്ങിയാണ് റെക്‌സ് 10 വിക്കറ്റ് വീഴ്ത്തിയത്. ഇതില്‍ ആറ് ഓവറും മെയ്ഡനായിരുന്നു. ഒന്നാം ഇന്നിങ്‌സിലും അഞ്ചു വിക്കറ്റ് വീഴ്ത്തി മണിപ്പൂരി ബോളര്‍മാരില്‍ മുന്‍പനായ റെക്‌സ്, മല്‍സരത്തിലാകെ 15 വിക്കറ്റ് വീഴ്ത്തി. ഒന്നാം ഇന്നിങ്‌സില്‍ റെക്‌സ് അഞ്ചു വിക്കറ്റെടുത്തത് 10.5 ഓവറില്‍ 33 റണ്‍സ് മാത്രം വഴങ്ങിയാണ്.

ടോസ് നേടിയ മണിപ്പൂര്‍ ക്യാപ്റ്റന്‍, അരുണാചല്‍ പ്രദേശിനെ ബാറ്റിങ്ങിന് അയയ്ക്കുകയായിരുന്നു. അഞ്ചു വിക്കറ്റ് വീഴ്ത്തിയ റെക്‌സ് സിങ്ങിന്റെ നേതൃത്വത്തില്‍ മണിപ്പൂരി ബോളര്‍മാര്‍ അരുണാചലിനെ 138 റണ്‍സില്‍ ഒതുക്കി. എന്നാല്‍, മറുപടി ബാറ്റിങ്ങില്‍ മണിപ്പൂരി താരങ്ങള്‍ക്കും ശോഭിക്കാനായില്ല. അഞ്ചു വിക്കറ്റ് വീഴ്ത്തിയ ഗോവിന്ദ് മിട്ടല്‍, നാലു വിക്കറ്റുമായി ബാഗ്ര എന്നിവര്‍ ചേര്‍ന്ന് മണിപ്പൂരിനെ 122 റണ്‍സില്‍ ഒതുക്കി. ഇതോടെ അരുണാചലിന് സ്വന്തമായത് 16 റണ്‍സ് ഒന്നാം ഇന്നിങ്‌സ് ലീഡ്.

എന്നാല്‍, രണ്ടാം ഇന്നിങ്‌സില്‍ 10 വിക്കറ്റും പോക്കറ്റിലാക്കി റെക്‌സ് അവതരിച്ചതോടെ അരുണാചലിന് പിടിവിട്ടു. വെറും 18.5 ഓവറില്‍ വെറും 36 റണ്‍സിന് എല്ലാവരും പുറത്ത്. അരുണാചല്‍ നിരയില്‍ രണ്ടക്കം കടന്നത് 12 റണ്‍സെടുത്ത ശിവേന്ദര്‍ ശര്‍മ മാത്രം. ആറു പേര്‍ 'സംപൂജ്യ'രായി. രണ്ടാം ഇന്നിങ്‌സില്‍ ജയിക്കാനാവശ്യമായിരുന്ന 55 റണ്‍സ് 7.5 ഓവറില്‍ വിക്കറ്റൊന്നും നഷ്ടപ്പെടുത്താതെ മണിപ്പൂര്‍ മറികടക്കുകയും ചെയ്തു.