142 വര്ഷത്തെ ടെസ്റ്റ് ചരിത്രത്തില് ഇന്നോളം നടക്കാത്തത് നേടിയ ഐറിഷ് താരത്തിന് റെക്കോഡ്!
142 വര്ഷത്തെ ടെസ്റ്റ് ചരിത്രത്തില് അപൂര്വ നേട്ടം സ്വന്തമാക്കുന്ന ആദ്യ കളിക്കാരനെന്ന റെക്കോഡ് അയര്ലന്ഡ് താരം സ്വന്തമാക്കി. ടെസ്റ്റ് മത്സരത്തിന്റെ രണ്ട് ഇന്നിംഗ്സിലും 25 റണ്സിനു മുകളില് സ്കോര് ചെയ്യുന്ന ആദ്യ 11-ാം നമ്പര് ബാറ്റ്സ്മാന് എന്ന നേട്ടമാണ് ഐറിഷ് താരം ടിം മുര്ത സ്വന്തമാക്കിയത്.
142 വര്ഷത്തെ ടെസ്റ്റ് ചരിത്രത്തില് ഇത്തരമൊരു സംഭവം ഇതാദ്യമാണ്. അഫ്ഗാനിസ്താനെതിരായ ഏക ടെസ്റ്റ് മത്സരത്തിലാണ് ടിം മുര്തയുടെ ഈ നേട്ടം. കഴിഞ്ഞ വര്ഷം ടെസ്റ്റ് പദവി ലഭിച്ച ശേഷം ഇരു രാജ്യങ്ങളും കളിക്കുന്ന രണ്ടാമത്തെ മാത്രം ടെസ്റ്റ് മത്സരമാണിത്. ആദ്യ ഇന്നിംഗ്സില് 172 റണ്സിന് പുറത്തായ അയര്ലന്ഡിന്റെ ടോപ്പ് സ്കോറര് 54 റണ്സെടുത്ത ടിം ആയിരുന്നു.
രണ്ടാം ഇന്നിംഗ്സിലും അവസാനം ബാറ്റിങ്ങിനിറങ്ങിയ ടിം 27 റണ്സ് സ്കോര് ചെയ്തു. ഇതോടെ ചരിത്രത്തിലേക്ക് കയറുകയായിരുന്നു. ആദ്യ ഇന്നിംഗ്സില് 54 റണ്സെടുത്ത ടിം, ടീമിന്റെ ടോപ്പ് സ്കോററാകുന്ന പതിനൊന്നാമത്തെ 11-ാം നമ്പര് ബാറ്റ്സ്മാന് എന്ന നേട്ടവും സ്വന്തമാക്കി.
എന്നാല് ടിം റെക്കോഡ് സ്വന്തമാക്കിയ ടെസ്റ്റില് തോല്ക്കാനായിരുന്നു അയര്ലന്ഡിന്റെ വിധി. രണ്ടാം ഇന്നിംഗ്സില് 147 റണ്സ് വിജയലക്ഷ്യവുമായി ഇറങ്ങിയ അഫ്ഗാന് മൂന്നു വിക്കറ്റ് നഷ്ടത്തില് ലക്ഷ്യത്തിലെത്തി. അഫ്ഗാന്റെ ആദ്യ ടെസ്റ്റ് വിജയമാണിത്.
https://www.facebook.com/Malayalivartha