ഇന്ത്യൻ ക്രിക്കറ്റിലെ രാജകുമാരൻ അന്താരാഷ്ട്ര ക്രിക്കറ്റിൽ നിന്നും വിരമിക്കുന്നതായി റിപ്പോർട്ടുകൾ.2011 ഐ.സി.സി ക്രിക്കറ്റ് ലോകകപ്പിൽ മികച്ച താരമായിരുന്ന യുവരാജ് ഇന്ത്യൻ ക്രിക്കറ്റിലെ നട്ടെല്ലായാണ് അറിയപ്പെടുന്നത്. 2007 ട്വന്റി-ട്വന്റി ലോകകപ്പിൽ ഇംഗ്ലണ്ട് താരം സ്റ്റുവർട്ട് ബ്രോഡിനെതിരെ നേടിയ ആറ് പന്തിൽ ആറ് സിക്സർ ആരാധകർക്ക് മറക്കാൻ പറ്റുന്നതല്ല. 2011 ലോകകപ്പിന് ശേഷം വിധി ക്യാൻസറിന്റെ രൂപത്തിൽ യുവിയെ വേട്ടയാടിയപ്പോഴും പൊരുതാനുള്ള മനസ്സാണ് യുവിയെ ഇന്നും കരുത്തനായി ജീവിക്കുന്നതിൽ മുഖ്യ പങ്ക് വഹിച്ചത്. 304 ഏകദിന മത്സരങ്ങൾ കളിച്ച യുവിയുടെ പേരിൽ 14 സെഞ്ചുറികൾ ഉണ്ട്. ഓൾ റൗണ്ടറായി തിളങ്ങിയ യുവരാജ് 111 വിക്കറ്റുകളും നേടിയിട്ടുണ്ട്. 2000 ഒക്ടോബറിൽ കെനിയയ്‌ക്കെതിരെ ആയിരുന്നു യുവരാജ് സിംഗിന്റെ ഏകദിന അരങ്ങേറ്റം. 40 ടെസ്റ്റ് മത്സരങ്ങളും 58 ട്വന്റി-ട്വന്റി മത്സരങ്ങളും കളിച്ചിട്ടുണ്ട്. നിലവിൽ ഐ.പി.എല്ലിൽ മുംബൈ ഇന്ത്യൻസിനായാണ് യുവി കളിക്കുന്നത്. വിദേശ ലീഗുകളിൽ കളിക്കാനാണ് ഇനി യുവിയുടെ പരിശ്രമം.