ബിസിസിഐയുടെ ട്വിറ്ററിലെ ഒരു ചോദ്യം വൈറലാകുകയാണ്. ലോകകപ്പ് മത്സരത്തിന് ചെറിയ ഇടവേളയെടുത്തിരിക്കുന്ന  ഇന്ത്യന്‍ കളിക്കാരുടെ മുടിയുടെ സ്‌റ്റൈലിനെ കുറിച്ചാണ് ബിസിസിഐയുടെ ചോദ്യം.

ക്യാപ്റ്റന്‍ വിരാട് കോലി, എം.എസ്. ധോണി, ഹാര്‍ദിക് പാണ്ഡ്യ, യുസ്വേന്ദ്ര ചാഹല്‍ എന്നിവരുടെ ചിത്രങ്ങളോടൊപ്പം 'ആരുടേതാണ് കൂളെസ്റ്റ് ഹെയര്‍കട്ട്?' എന്ന ചോദ്യമാണ് ബിസിസിഐ ട്വിറ്ററില്‍ പോസ്റ്റ് ചെയ്തിരിക്കുന്നത്.

പാക്കിസ്ഥാനെതിരായ ജയത്തിനു ശേഷം ഇന്ത്യയ്ക്ക് ലോകകപ്പില്‍ 5 ദിവസം ഇടവേള ലഭിച്ചിട്ടുണ്ട്. 22-ന് അഫ്ഗാനിസ്ഥാനെതിരെയാണ് ഇന്ത്യയുടെ അടുത്ത മല്‍സരം.

ഇതോടെയാണ് മുടിയുടെ സ്‌റ്റൈല്‍ ഒന്ന് മാറ്റി പിടിക്കാന്‍ ഇന്ത്യന്‍ താരങ്ങള്‍ തീരുമാനിച്ചത്. പ്രമുഖ ഹെയര്‍ സ്റ്റൈലിസ്റ്റായ അലിം ഹക്കീമാണ് ഇന്ത്യന്‍ താരങ്ങളുടെ പുതിയ ഹെയര്‍ സ്റ്റൈല്‍ ഒരുക്കിയത്. അലിം ഹക്കിം താരങ്ങളുടെ മുടി വെട്ടുന്ന ചിത്രങ്ങളും ട്വിറ്ററില്‍ പോസ്റ്റ് ചെയ്തിരുന്നു.

ബിസിസിഐയുടെ ചോദ്യത്തിന് മറുപടിയുമായി നിരവധി ആരാധകരാണ് രംഗത്ത് എത്തിയത്. എന്നാല്‍ മിക്കവരും ധോണി പ്രിയര്‍ തന്നെയാണ്.

ധോണിക്കൊപ്പം കോലിയുടെ ഹെയര്‍കട്ടിനും ആരാധകരുണ്ട്. പാണ്ഡ്യയുടേയും ചാഹലിന്റേയും ഹെയര്‍കട്ട് കൊള്ളാമെന്ന് പറഞ്ഞും പലരും എത്തി. എന്നാല്‍ ഒരു ആരാധകന്‍ പറഞ്ഞ് ഇവരുടെയൊന്നുമല്ല ഇന്ത്യന്‍ കോച്ച് രവി ശാസ്ത്രിയുടേതാണ് നല്ല മുടിയെന്നാണ്.