ലോകകപ്പിലെ പോരാട്ടങ്ങള്‍ക്ക് തുടക്കമാകുന്നതിന് മുന്നോടിയായി നാല് ടീമുകളുടെയും നായകന്‍മാരെ അണിനിരത്തി ഐസിസി ഒരു ചിത്രം ട്വീറ്റ് ചെയ്തു. ആ ചിത്രം കണ്ട മലയാളികളുടെ മനസ്സിൽ ലഡു പൊട്ടി. എവിടെയോ കണ്ടു മറന്ന ചിത്രത്തിന്റെ മാതൃക. കുമ്പളങ്ങി നൈറ്റ്സ് എന്ന മലയാള ചിത്രത്തിൻറെ ഫസ്റ്റ് ലുക്ക് പോസ്റ്റർ എല്ലാവരുടെയും മനസ്സിലേക്ക് ഓടി വന്നു. ഈ ഫസ്റ്റ് ലുക്ക് പോസ്റ്ററിന് വലിയ സ്വീകാര്യതയാണ് അന്ന് ലഭിച്ചത്. ഷെയ്ന്‍ നിഗം, ശ്രീനാഥ് ഭാസി, സൗബിന്‍ ഷാഹിര്‍ എന്നിവരായിരുന്നു അതിൽ പ്രത്യക്ഷപ്പെട്ടത്. കുമ്പളങ്ങി നൈറ്റ്സ് കണ്ടിട്ടാണോ ഇത്തരത്തിലൊരു പോസ്റ്റർ പുറത്തു വിട്ടതെന്ന് വരെ ആയി ആരാധകരുടെ ചോദ്യം.

എന്നാൽ കുമ്പളങ്ങി നൈറ്റ്സിനും പിന്നിൽ നിൽക്കുകയാണ് ഈ ചിത്രത്തിന്റെ അനുകരണ കഥ. പ്രസിദ്ധ റോക്ക് സംഗീത ബാന്‍റായ ബീറ്റില്‍സിന്‍റെ ‘അബ്ബേ റോഡ്’ എന്ന ആല്‍ബത്തിന്‍റെ കവര്‍ ചിത്രത്തിൻറെ മാതൃകയാണിത്. 1969 സെപ്റ്റംബര്‍ 26ന് ബിറ്റില്‍സിന്‍റെ 11-ാം ആല്‍ബമായാണ് അബ്ബേ റോഡ് പുറത്തിറങ്ങിയത്. ഈ വിഖ്യാത കവര്‍ ചിത്രത്തിന്‍റെ ഒട്ടേറെ അനുകരണങ്ങള്‍ പിന്‍കാലത്ത് പുറത്തുവന്നു. അതിൽ രണ്ടെണ്ണം മാത്രമാണ് ക്രിക്കറ്റിലും സിനിമയിലും നാം കണ്ടിരിക്കുന്നത്.