വെസ്റ്റ്‌ ഇന്‍ഡീസ് താരം ക്രിസ് ഗെയില്‍ സമൂഹ മാധ്യമങ്ങളില്‍ പങ്കുവച്ച ചിത്രത്തിൽ കോടികളുടെ തട്ടിപ്പ് കേസിൽ പിടിക്കിട്ടാപ്പുള്ളിയായി ഇന്ത്യയിൽ നിന്നും മുങ്ങിയ വിജയ് മല്യ. ഇതാണിപ്പോൾ സോഷ്യൽ മീഡിയയിലെ ചർച്ച വിഷയം.

ഐപിഎല്ലില്‍ ഗെയില്‍ ഭാഗമായിരുന്ന റോയല്‍ ചലഞ്ചെഴ്സ് ബാംഗ്ലൂരിന്‍റെ ഉടമയായിരുന്നു മല്യ. 9,000 കോടിയുടെ തട്ടിപ്പ് നടത്തി ഇന്ത്യ വിട്ട വിവാദ മദ്യവ്യവസായി വിജയ് മല്യയ്ക്കൊപ്പം നില്‍ക്കുന്ന ചിത്രമാണ് ഗെയില്‍ പങ്കുവച്ചിരിക്കുന്നത്. ബിഗ്‌ ബോസിനെ കണ്ടുമുട്ടിയപ്പോള്‍ എന്ന അടിക്കുറിപ്പോടെയാണ് ഗെയില്‍ ചിത്രം ഇട്ടിരിക്കുന്നത്. ചിത്രം വൈറലായതോടെ നിരവധി ട്രോളുകളും മീമുകളും പിന്നാലെ വന്നു. 2016 മാര്‍ച്ചില്‍ നാടുവിട്ട മല്യയെ മുബൈയിലെ പ്രത്യേക കോടതി പിടികിട്ടാപ്പുള്ളിയായി പ്രഖ്യാപിച്ചിരുന്നു. കിംഗ് ഫിഷര്‍ എയര്‍ലൈന്‍സിന് വേണ്ടി വന്‍തുകകള്‍ ബാങ്കില്‍ നിന്നും വായ്പയായി വാങ്ങിയ മല്യ അത് വീട്ടിയിട്ടില്ല. വന്‍ മുതല്‍ മുടക്കില്‍ തുടങ്ങിയ കിംഗ് ഫിഷര്‍ എയര്‍ലൈന്‍സ് നഷ്ടത്തിലായതോടെ കമ്പനി അടച്ചുപൂട്ടുകയും ചെയ്തു.

ഇതേ തുടർന്നു മല്യയുടെ പാസ്പോര്‍ട്ട് വിദേശകാര്യ മന്ത്രാലയം റദ്ദാക്കി. ബാങ്ക് വായ്പാ തിരിച്ചടവില്‍ വീഴ്ച വരുത്തിയതിനു പുറമെ ഇയാൾക്കെതിരെ നികുതി വെട്ടിപ്പിനും സാമ്പത്തിക ക്രമക്കേടിനും ഇന്ത്യയില്‍ കേസുകൾ നില നിൽക്കവെയാണ് മല്യ വിദേശത്തു ഫോട്ടോ എടുത്തു നടക്കുന്നതു .