ഇനി ഇന്ത്യന്‍ ജഴ്‌സിയില്‍ ബൈജൂസ് ആപ്പ്
ഇന്ത്യന്‍ ക്രിക്കറ്റ് ടീമിന്റെ വിഖ്യാതമായ നീല ജഴ്‌സിയില്‍ 'മലയാളി കയ്യൊപ്പ്' പതിയുന്നു. ഇന്ത്യന്‍ ടീം ജഴ്‌സിയുടെ സ്‌പോണ്‍സര്‍ഷിപ് അവകാശം മലയാളി സംരംഭകന്‍ ബൈജു രവീന്ദ്രന്റെ 'ബൈജൂസ് ആപ്പ്' സ്വന്തമാക്കി. ചൈനീസ് മൊബൈല്‍ ബ്രാന്‍ഡ് ഒപ്പോയാണ് നിലവിലെ സ്‌പോണ്‍സര്‍.
അതിന് പകരമായി ഇനി 'ബൈജൂസ് ആപ്പ്' ഇന്ത്യന്‍ ജഴ്‌സിയില്‍ ഇടംപിടിക്കും. ഓഗസ്റ്റ് മൂന്നു മുതല്‍ സെപ്റ്റംബര്‍ രണ്ടു വരെ നീളുന്ന വെസ്റ്റിന്‍ഡീസ് പര്യടനത്തോടെ ഒപ്പോ ഇന്ത്യന്‍ ജഴ്‌സിയില്‍നിന്നു പുറത്താകും. സെപ്റ്റംബര്‍ 15-ന് ആരംഭിക്കുന്ന ദക്ഷിണാഫ്രിക്കയുടെ ഇന്ത്യന്‍ പര്യടനത്തോടെ 'ബൈജൂസ് ആപ്പ്' ഇന്ത്യന്‍ ജഴ്‌സിയില്‍ അരങ്ങേറ്റം കുറിക്കും.
2017-ലാണ് ഇന്ത്യന്‍ ജഴ്‌സിയുടെ സ്‌പോണ്‍സര്‍ഷിപ് അവകാശം ഒപ്പോ സ്വന്തമാക്കിയത്. 768 കോടി രൂപയുമായി രംഗത്തുണ്ടായിരുന്ന വിവോ മൊബൈല്‍സിനെ പിന്തള്ളി 1079 കോടി രൂപയ്ക്കാണ് അഞ്ചു വര്‍ഷത്തേക്ക് ഒപ്പോ കരാര്‍ സ്വന്തമാക്കിയത്. ഈ അവകാശമാണ് ചൈനീസ് കമ്പനി ബൈജൂസ് ആപ്പിന് മറിച്ചുവിറ്റത്.
ഫലത്തില്‍, 2022 മാര്‍ച്ച് 31 വരെ ബൈജൂസ് ആപ്പ് ഇന്ത്യന്‍ ജഴ്‌സിയില്‍ ഉണ്ടാകും. ഇന്ത്യയില്‍ കഴിഞ്ഞ അഞ്ചുകൊല്ലത്തിനിടെ ഏറ്റവും മൂല്യം നേടിയെടുത്ത കമ്പനികളില്‍ ഒന്നാണ് കണ്ണൂരുകാരന്‍ ബൈജു രവീന്ദ്രന്റെ ബൈജൂസ് ആപ്പ്.
https://www.facebook.com/Malayalivartha
