ഇന്ത്യന്‍ ക്രിക്കറ്റ് ടീം മുഖ്യ പരിശീലക സ്ഥാനത്തേക്ക് മുന്‍ ന്യൂസിലന്‍ഡ് പരിശീലകനായ മൈക്ക് ഹെസന്‍ അപേക്ഷ നല്‍കുമെന്നാണ് പുറത്തു വരുന്ന വിവരം. പരീശീലകനാകാനുള്ള അപേക്ഷകൾ ജൂലൈ 30 വരെയാണ് സ്വീകരിക്കുക. മഹേള ജയവര്‍ധനെ, ടോം മൂഡി, വീരേന്ദര്‍ സെവാഗ് അടക്കമുള്ള താരങ്ങൾ പരിശീലക സ്ഥാനത്തേക്ക് അപേക്ഷിച്ചതായാണ് നേരത്തെ വന്ന വിവരങ്ങൾ. ആ സ്ഥാനത്തേക്ക് മൈക്ക് ഹെസനും അപേക്ഷിക്കുന്നുവെന്നാണ് പുതിയ വിവരം. ന്യൂസിലന്‍ഡിനൊപ്പം മികച്ച നേട്ടങ്ങളാണ് മൈക്ക് ഹെസൻ നേടിയിട്ടുള്ളത്. കിവികളെ 2012 മുതല്‍ 2018 വരെ പരിശീലിപ്പിച്ചപ്പോള്‍ 2015ൽ അവർ ലോകകപ്പ് ഫൈനലിലെത്തി. ഐപിഎല്ലില്‍ കഴിഞ്ഞ സീസണില്‍ കിംഗ്‌സ് ഇലവന്‍ പഞ്ചാബിനെ പരിശീലിപ്പിച്ചതും മൈക്കായിരുന്നു.

കപില്‍ ദേവ്, ശാന്ത രംഗസ്വാമി, അന്‍ഷുമാന്‍ ഗെയ്‌ക്‌വാദ് എന്നിവരടങ്ങിയ ഉപദേശകസമിതിയാണ് പരിശീലകരെ തെരഞ്ഞെടുക്കുക. ബിസിസിഐ ഇടക്കാല ഭരണസമിതിയാണ് ഇവരെ ചുമതലപ്പെടുത്തിയത്. വിന്‍ഡീസ് പര്യടനം അവസാനിക്കും വരെ രവി ശാസ്ത്രിയുടെ നേതൃത്വത്തിലുള്ള പരിശീലക സംഘമാണ് ഇന്ത്യൻ ടീമിനെ പരിശീലിപ്പിക്കുക ആഗസ്റ്റ് മൂന്ന് മുതല്‍ സെപ്റ്റംബര്‍ മൂന്ന് വരെയാണ് ഇന്ത്യയുടെ വിന്‍ഡീസ് പര്യടനം. ദക്ഷിണാഫ്രിക്കയ്‌ക്കെതിരായ പരമ്പര തുടങ്ങുന്നതിനു മുൻപ് പുതിയ പരിശീലക സംഘത്തെ നിയമിക്കും.