ക്രിക്കറ്റ് ലോകം ഇതാ മറ്റൊരു ലോകകപ്പിനായി ഒരുങ്ങുന്നു. നാളെ ഇംഗ്ലണ്ട്- ഓസ്‌ട്രേലിയ ആഷസ് പരമ്പരയോടെ തുടങ്ങുന്നത് പുതിയ ചരിത്രമാണ്; ലോക ടെസ്റ്റ് ചാംപ്യന്‍ഷിപ്പ്.

ഏകദിനം, ട്വന്റി20 എന്നിവയ്ക്കുള്ളതു പോലെ ടെസ്റ്റ് ക്രിക്കറ്റിനും ഒരു ലോകകപ്പ് എന്ന ചിന്തയില്‍ നിന്നാണ് ലോക ടെസ്റ്റ് ചാംപ്യന്‍ഷിപ്പിന്റെ പിറവി. ഓഗസ്റ്റ് 22-ന് വെസ്റ്റിന്‍ഡീസിന് എതിരെ നടക്കുന്ന ആദ്യ ടെസ്റ്റോടെ ഇന്ത്യയുടെ പോരാട്ടത്തിനും തുടക്കമാകും.

വിവിധ ടെസ്റ്റ് പരമ്പരകളിലായി രണ്ടു വര്‍ഷം നീളുന്നതാണ് ചാംപ്യന്‍ഷിപ്പ്. ഇവയില്‍ പോയിന്റ് അടിസ്ഥാനത്തില്‍ മുന്നിലെത്തുന്ന രണ്ടു ടീമുകള്‍ 2021-ല്‍ നടക്കുന്ന ഫൈനലില്‍ ഏറ്റുമുട്ടും.

നാളെ തുടങ്ങുന്ന ആഷസ് പരമ്പരയോടെയാണ് തുടക്കം. 2021 ഫെബ്രുവരിയില്‍ നടക്കുന്ന വെസ്റ്റ് ഇന്‍ഡീസ്-ശ്രീലങ്ക പരമ്പരയാണ് അവസാന മത്സരം. പോയിന്റ് അടിസ്ഥാനത്തില്‍ മുന്നിലുള്ള രണ്ടു ടീമുകള്‍ ജൂണ്‍ 10 മുതല്‍ 14 വരെ ലോര്‍ഡ്‌സില്‍ ഫൈനല്‍ കളിക്കും.

ഐസിസിയുടെ ടെസ്റ്റ് റാങ്കിങ്ങില്‍ ആദ്യ 9 സ്ഥാനക്കാര്‍ക്കാണ് ചാംപ്യന്‍ഷിപ്പില്‍ മത്സരിക്കാന്‍ അവസരം ലഭിക്കുന്നത്.
ഇക്കാലയളവില്‍ ഇവര്‍ക്കും മത്സരങ്ങളുണ്ടെങ്കിലും ചാംപ്യന്‍ഷിപ്പിന്റെ ഭാഗമായി പരിഗണിക്കില്ല.

ചാംപ്യന്‍ഷിപ്പില്‍ പങ്കെടുക്കുന്ന ടീമുകള്‍ തന്നെ ഇക്കാലയളവില്‍ ഇതിലപ്പുറം പരമ്പരകളുണ്ടായേക്കാം. ഒരു ടീമിന് 6 രാജ്യങ്ങളുമായി 6 പരമ്പരകളാണ് ടൂര്‍ണമെന്റില്‍ കളിക്കേണ്ടത്. 3 വീതം ഹോം, എവേ പരമ്പരകള്‍. എട്ട് ടീമുകളുള്ളതില്‍ 2 ടീമുകളുമായി മത്സരിക്കേണ്ടതില്ല.

ഇന്ത്യക്ക് പാക്കിസ്ഥാനും ശ്രീലങ്കയ്ക്കുമെതിരെ കളിയില്ല. ഓരോ ടീമും കളിക്കുന്ന മത്സരങ്ങളുടെ എണ്ണം വ്യത്യസ്തമായിരിക്കുമെങ്കിലും പരമ്പരകളുടെ എണ്ണം ആറു തന്നെ.

ഒരു പരമ്പരയില്‍ നിന്ന് പരമാവധി ഒരു ടീമിന് 120 പോയിന്റ് ലഭിക്കും. പരമ്പരകളില്‍ 2 മുതല്‍ 5 ടെസ്റ്റുകള്‍ വരെയാകാമെങ്കിലും പോയിന്റ് വിഹിതം തുല്യമായിരിക്കും.

2 ടെസ്റ്റ് പരമ്പരയില്‍ ഒരു ടെസ്റ്റ് ജയിച്ചാല്‍ 60 പോയിന്റ് ലഭിക്കുമെങ്കില്‍ 5 ടെസ്റ്റ് പരമ്പരയില്‍ ഒരു ടെസ്റ്റ് ജയത്തിന്റെ മൂല്യം 24 പോയിന്റ് മാത്രം.

ടൈയ്ക്കും ടെസ്റ്റ് സമനിലയ്ക്കും ആനുപാതികമായി പോയിന്റുകള്‍ കുറയും. തോറ്റാല്‍ പോയിന്റൊന്നും ഇല്ല.

ഫൈനല്‍ സമനിലയോ ടൈയോ ആയാല്‍ രണ്ടു ടീമിനെയും സംയുക്ത ജേതാക്കളാക്കി പ്രഖ്യാപിക്കും. മഴ കൊണ്ടോ മറ്റേതെങ്കിലും കാരണം കൊണ്ടോ മത്സരം തടസ്സപ്പെട്ടാല്‍ റിസര്‍വ് ഡേ ഉണ്ടാകും.

ഇന്ത്യയുടെ മത്സരങ്ങള്‍

2019 ഓഗസ്റ്റ് - ഇന്ത്യ/വെസ്റ്റിന്‍ഡീസ്- 2 ടെസ്റ്റ്

 2019 ഒക്ടോബര്‍ -ദക്ഷിണാഫ്രിക്ക/ ഇന്ത്യ- 3 ടെസ്റ്റ്

2019 നവംബര്‍-ബംഗ്ലദേശ് /ഇന്ത്യ- 2 ടെസ്റ്റ്

2020 ഫെബ്രുവരി -ഇന്ത്യ/ ന്യൂസീലന്‍ഡ്- 2 ടെസ്റ്റ്

2020 നവംബര്‍- ഇന്ത്യ/ഓസ്‌ട്രേലിയ -4 ടെസ്റ്റ്

2021 ജനുവരി- ഇംഗ്ലണ്ട്/  ഇന്ത്യ- 5 ടെസ്റ്റ്

ഇന്ത്യ, ന്യൂസീലന്‍ഡ്, ദക്ഷിണാഫ്രിക്ക, ഇംഗ്ലണ്ട്, ഓസ്‌ട്രേലിയ, ശ്രീലങ്ക, പാക്കിസ്ഥാന്‍, വെസ്റ്റിന്‍ഡീസ്, ബംഗ്ലദേശ് എന്നിവയാണ് പങ്കെടുക്കുന്ന രാജ്യങ്ങള്‍.

നിലവിലെ രീതിയില്‍ ഇന്ത്യയില്ലാത്ത പരമ്പരയില്‍ ഇന്ത്യന്‍ ആരാധകര്‍ക്കു വലിയ താല്‍പര്യമുണ്ടാകില്ല. എന്നാല്‍ ഈ പരമ്പരയും പോയിന്റും ലോകകപ്പ് ജേതാക്കളെ നിര്‍ണയിക്കുന്നതില്‍ പ്രധാനമെന്നു കണ്ടാല്‍ ഇതിനു മാറ്റം വരും. ഐസിസി ഉന്നംവയ്ക്കുന്നതും അതാണ്. കാണികളുടെ എണ്ണം കൂട്ടുക, കാണാനുള്ള കാരണം ഉണ്ടാക്കുക. കൂടാതെ രണ്ടുവര്‍ഷ കാലയളവില്‍ എല്ലാ ടീമുകള്‍ക്കും ഏറെക്കുറെ തുല്യ അവസരങ്ങള്‍ കിട്ടും.

തങ്ങളുടെ എതിരാളികളെ ടീമുകള്‍ക്കു തന്നെ തിരഞ്ഞെടുക്കാനുള്ള സ്വാതന്ത്ര്യമുണ്ടെന്നത് പ്രധാന പോരായ്മ. ചില ടീമുകള്‍ക്ക് ദുര്‍ബല എതിരാളികളെ പരാജയപ്പെടുത്തി എളുപ്പത്തില്‍ മുന്നേറാന്‍ അവസരമുണ്ട്. നാട്ടില്‍ നേടുന്ന അനായാസ ജയങ്ങള്‍ക്കും വിദേശത്ത് അധ്വാനിച്ചു നേടുന്ന ജയങ്ങള്‍ക്കും ഒരേ പോയിന്റാണ് ലഭിക്കുന്നത്.