ത്രിരാഷ്ട്ര പരമ്പരയിലെ നാലാം ഏകദിനത്തില്‍ ഇംഗ്‌ളണ്ടിനെ മൂന്ന് വിക്കറ്റിന് പരാജയപ്പെടുത്തി ആസ്‌ട്രേലിയ ഫൈനലില്‍ കടന്നു. ടോസ് നഷ്ടപ്പെട്ട് ബാറ്റിംഗിനിറങ്ങിയ ഇംഗ്‌ളണ്ട് നിശ്ചിത 50 ഓവറില്‍ എട്ട് വിക്കറ്റ് നഷ്ടത്തില്‍ 303 റണ്‍സെടുത്തു. സെഞ്ച്വറി നേടിയ ഇയാന്‍ ബെല്‍ (141), ജോ റൂട്ട് (69) എന്നിവരുടെ ബാറ്റിംഗാണ് ഇംഗ്‌ളണ്ടിനെ മികച്ച സ്‌കോറിലെത്തിച്ചത്.

എന്നാല്‍ ക്യാപ്ടന്‍ സ്മിത്ത് പുറത്താവാതെ നേടിയ 102 റണ്‍സിന്റെ ബലത്തില്‍ ആസ്‌ട്രേലിയ ഒരു പന്ത് ബാക്കി നില്‍ക്കെ 304 റണ്‍സെടുത്ത് ലക്ഷ്യം കണ്ടു. ഷോണ്‍ മാര്‍ഷ് (45), ബ്രാഡ് ഹാഡിന്‍ (42) എന്നിവര്‍ ആസ്‌ട്രേലിയയ്ക്ക് വേണ്ടി മികച്ച പ്രകടനം കാഴ്ചവച്ചു. ടൂര്‍ണമെന്റിലെ കളിച്ച നാല് മത്സരങ്ങളും ജയിച്ചാണ് ആസ്‌ട്രേലിയ ഫൈനലില്‍ എത്തിയത്.