പാക്കിസ്ഥാന് ക്രിക്കറ്റ് ബോര്ഡ് ഇന്ത്യയെ കണ്ടുപഠിക്കണമെന്ന് റമീസ് രാജ
പാക്കിസ്ഥാന് ക്രിക്കറ്റ് ബോര്ഡിനോട് (പിസിബി), ക്രിക്കറ്റ് ഭരണവും കളിയും ഇന്ത്യയെ 'കണ്ടു പഠിക്കാന്' മുന് പാക്കിസ്ഥാന് താരം കൂടിയായ റമീസ് രാജ ആവശ്യപ്പെട്ടു. രാജ്യവ്യാപകമായി വേരുകളുള്ള ക്രിക്കറ്റിനെ എങ്ങനെയാണ് മുന്നോട്ടു കൊണ്ടുപോകേണ്ടതെന്ന് ഇന്ത്യന് ക്രിക്കറ്റ് കണ്ട്രോള് ബോര്ഡിനെ (ബിസിസിഐ) നോക്കി പഠിക്കാനാണ് റമീസ് രാജ ആവശ്യപ്പെടുന്നത്. കളിയോടുള്ള സമീപനത്തില് വിരാട് കോലിയെയും സംഘത്തെയും മാതൃകയാക്കാമെന്നും റമീസ് രാജ അഭിപ്രായപ്പെട്ടു.
കളിയെ സമീപിക്കുന്ന രീതിയില്ത്തന്നെ ഇന്ന് വ്യാപകമായി മാറ്റം വന്നു കഴിഞ്ഞു. ടീമുകള് തമ്മിലുള്ള നേര്ക്കുനേര് പോരാട്ടമാണ് ഇപ്പോഴത്തെ പ്രത്യേകത. വിരാട് കോലിയേയും സംഘത്തെയും നോക്കുക. ആക്രമണോത്സുകത കൊണ്ടും നിര്ഭയമായ സമീപനം കൊണ്ടും അവര് ഇന്ത്യയുടെ കളിയെ തന്നെ മാറ്റിമറിച്ചുവെന്ന് തന്റെ യൂട്യൂബ് ചാനലില് റമീസ് രാജ പറഞ്ഞു.
പാക്കിസ്ഥാന്റെ പ്രകടനത്തെ 'കുമിളയ്ക്കുള്ളിലെ കളി'യോട് ഉപമിച്ച റമീസ് രാജ, രാജ്യാന്തര തലത്തില് ശക്തരായ എതിരാളികള് വന്നാല് ടീം തകര്ന്നുപോകുമെന്നും ചൂണ്ടിക്കാട്ടി.
'ലോകകപ്പിലും ഏഷ്യാകപ്പിലും ടെസ്റ്റിലും കളിക്കുമ്പോള് ശക്തരായ ടീമുകള്ക്കെതിരെ പാക്കിസ്ഥാന്റെ ദൗര്ബല്യങ്ങളെല്ലാം തുടര്ച്ചയായി പുറത്തുവരാറുണ്ട്. എതിര് ടീമുകള് ഏറ്റവും സുന്ദരവും ആകര്ഷകവുമായി കളിക്കുമ്പോള് പാക്കിസ്ഥാന് ടീം ഇപ്പോഴും 1970-കളില് തങ്ങിനില്ക്കുകയാണ്'. അതിനാല് പാക്കിസ്ഥാനും അവരുടെ ജനിതക ഘടനയോടു ചേര്ന്നു നില്ക്കുന്ന സമീപനമാണു സ്വീകരിക്കേണ്ടത്. കളിയെ ഏറ്റവും ആധുനികമായി സമീപിക്കാന് അനുവദിക്കുന്നൊരു വ്യക്തിയെയാണ് പാക്കിസ്ഥാന് ക്രിക്കറ്റിന് ഇന്ന് ആവശ്യം. - റമീസ് രാജ പറഞ്ഞു.
https://www.facebook.com/Malayalivartha
