'ഭാവി'യെ കുറിച്ച് ചോദിച്ചപ്പോള് കോലിയുടെ മറുപടി : ധോണി ഡ്രസിങ് റൂമിലുണ്ട്, വന്ന് ഹലോ പറയൂ!
ദക്ഷിണാഫ്രിക്കയ്ക്കെതിരായ മത്സരത്തിനുശേഷം പതിവുള്ള വാര്ത്താ സമ്മേളനത്തിന് എത്തിയ കോലിയോട് മഹേന്ദ്രസിങ് ധോണിയുടെ ഭാവിയെക്കുറിച്ച് ചോദിച്ച മാധ്യമപ്രവര്ത്തകന് ഇന്ത്യന് ക്യാപ്റ്റന് വിരാട് കോലി നല്കിയ ഉത്തരം സമൂഹമാധ്യമങ്ങളില് വൈറലാകുന്നു.
മൂന്നാം ക്രിക്കറ്റ് ടെസ്റ്റിലും ഇന്നിങ്സ് വിജയം നേടി പരമ്പര തൂത്തുവാരിയതിന്റെ ആഹ്ലാദത്തിനിടെയാണ് 'ധോണിയുടെ ഭാവി'യെക്കുറിച്ച് മാധ്യമപ്രവര്ത്തകന് കോലിയോട് ചോദ്യമുന്നയിച്ചത്.
ചിരിയോടെയാണ് മാധ്യമപ്രവര്ത്തകര് കോലിയുടെ സരസമായ മറുപടിയെ സ്വീകരിച്ചത്. ഇന്ത്യ-ദക്ഷിണാഫ്രിക്ക മൂന്നാം ടെസ്റ്റ് നടന്ന റാഞ്ചി, മഹേന്ദ്രസിങ് ധോണിയുടെ സ്വന്തം നാടാണ്. മത്സരത്തിന്റെ നാലാം ദിനമായ ഇന്നു രാവിലെ ഇന്ത്യന് വിജയത്തിന് സാക്ഷിയാകാന് ധോണിയും സ്റ്റേഡിയത്തിലെത്തിയിരുന്നു. മത്സരശേഷം ഇന്ത്യന് താരങ്ങളെ കണ്ട ധോണി, ഈ ടെസ്റ്റിലൂടെ രാജ്യാന്തര ക്രിക്കറ്റില് അരങ്ങേറിയ ജാര്ഖണ്ഡുകാരന് ഷഹബാസ് നദീമിനൊപ്പം സമയം ചെലവഴിച്ചു.
എട്ടു വിക്കറ്റ് നഷ്ടത്തില് 132 റണ്സ് എന്ന നിലയില് നാലാം ദിനം ബാറ്റിങ് പുഃനരാരംഭിച്ച ദക്ഷിണാഫ്രിക്കയെ, തുടര്ച്ചയായ പന്തുകളില് വിക്കറ്റ് വീഴ്ത്തിയ ഷഹബാസ് നദീമാണ് അനിവാര്യമായ തോല്വിയിലേക്ക് തള്ളിവിട്ടത്.
'ആരാണ് ഇതെന്നു നോക്കൂ' എന്ന ക്യാപ്ഷനോടെ ഇന്ത്യന് ക്രിക്കറ്റ് കണ്ട്രോള് ബോര്ഡ് ധോണിയും നദീമും ഒന്നിച്ചുള്ള ചിത്രം ട്വീറ്റ് ചെയ്തിരുന്നു. പിന്നീട് ധോണിക്കൊപ്പമുള്ള ചിത്രം ഇന്ത്യന് പരിശീലകന് രവി ശാസ്ത്രിയും ട്വീറ്റ് ചെയ്തു. 'അതിശയകരമായ വിജയത്തിനുശേഷം ഒരു യഥാര്ഥ ഇന്ത്യന് ഇതിഹാസത്തെ അദ്ദേഹത്തിന്റെ തട്ടകത്തില് കാണാന് കഴിഞ്ഞതില് സന്തോഷം' എന്ന ക്യാപ്ഷനോടു കൂടിയായിരുന്നു ശാസ്ത്രിയുടെ ട്വീറ്റ്.
https://www.facebook.com/Malayalivartha