ശ്രീലങ്കന്‍ ബോളര്‍ ലക്ഷന്‍ സന്ദാകനു ഓസ്‌ട്രേലിയ-ശ്രീലങ്ക രണ്ടാം ട്വന്റി20 മത്സരത്തിനിടെ സംഭവിച്ചൊരു അബദ്ധം സമൂഹമാധ്യമങ്ങളില്‍ വൈറല്‍. മത്സരത്തില്‍ ഓസ്‌ട്രേലിയ രണ്ടാമതു ബാറ്റു ചെയ്യവെ സ്റ്റീവ് സ്മിത്ത് സമ്മാനിച്ച റണ്ണൗട്ടിനുള്ള സുവര്‍ണാവസരം സന്ദാകന്‍ അവിശ്വസനീയമായ രീതിയില്‍ പാഴാക്കുന്നതിന്റെ വിഡിയോയാണ് സമൂഹമാധ്യമങ്ങളില്‍ വൈറലായത്. 'ലൈഫ്' മുതലെടുത്ത് സ്മിത്ത്, അപരാജിത അര്‍ധസെഞ്ചുറിയുമായി ഓസീസിന് ഒന്‍പതു വിക്കറ്റിന്റെ കൂറ്റന്‍ വിജയവും സമ്മാനിച്ചു.

മത്സരത്തില്‍ ഓസീസ് താരങ്ങളുടെ ഉജ്വല ബോളിങ്ങിനു മുന്നില്‍ അടിപതറിയ ശ്രീലങ്ക 19 ഓവറില്‍ 117 റണ്‍സിനു പുറത്തായി. 118 റണ്‍സിന്റെ താരതമ്യേന ചെറിയ വിജയലക്ഷ്യം ഓസീസ് പിന്തുടരുമ്പോഴാണ് ആരാധകരെയും താരങ്ങളെയുമെല്ലാം 'ഞെട്ടിച്ച്' സന്ദാകന് അബദ്ധം പിണഞ്ഞത്.

ഓസീസ് ഇന്നിങ്‌സിലെ 13-ാം ഓവര്‍ ബോള്‍ ചെയ്തത് സന്ദാകനായിരുന്നു. ഓസീസ് വിജയത്തിന് തൊട്ടരികെ നില്‍ക്കുന്നു. ഈ സമയത്ത് വാര്‍ണറായിരുന്നു (55) ക്രീസില്‍. സ്മിത്ത് (52) നോണ്‍ സ്‌ട്രൈക്കേഴ്‌സ് എന്‍ഡിലും. ഓവറിലെ രണ്ടാം പന്ത് നേരിട്ട വാര്‍ണര്‍ സ്‌ട്രെയ്റ്റ് ഡ്രൈവിനാണ് ശ്രമിച്ചത്. നിലംപറ്റെയെത്തിയ പന്ത് നേരെ വന്ന് നോണ്‍ സ്‌ട്രൈക്കേഴ്‌സ് എന്‍ഡിലെ സ്റ്റംപിലിടിച്ചു. അപ്പോഴേക്കും സിംഗിളിനായി ഓടിയിറങ്ങിയ സ്റ്റീവ് സ്മിത്ത് ചിത്രത്തില്‍പ്പോലും ഉണ്ടായിരുന്നില്ല. സ്റ്റംപില്‍തട്ടി തൊട്ടരികെ കിടന്ന പന്തെടുത്ത് സ്മിത്തിനെ റണ്ണൗട്ടാക്കാന്‍ സന്ദാകനു മുന്നില്‍ ഇഷ്ടംപോലെ സമയമുണ്ടായിരുന്നു.

ഞൊടിയിടയില്‍ പന്തു പിടിച്ചെടുത്ത സന്ദാകന്‍ സ്റ്റംപിളക്കിയെങ്കിലും ചെറിയൊരു പിഴവു പറ്റി. വലംകൈകൊണ്ട് പന്തു പിടിച്ചെടുത്ത സന്ദാകന്‍, ഇടംകൈകൊണ്ട് സ്റ്റംപ് വലിച്ചൂരി! വിക്കറ്റ് വീഴ്ത്തിയെന്ന ധാരണയില്‍ സന്ദാകന്‍ ആഹ്ലാദപ്രകടനത്തിനു തുനിയുമ്പോഴേയ്ക്കും സ്മിത്ത് ഓടി ക്രീസിലെത്തി. സ്റ്റംപു വലിച്ചൂരുമ്പോള്‍ സന്ദാകന്റെ ഒരു കയ്യില്‍ പന്തുണ്ടായിരുന്നെങ്കിലും, സ്റ്റംപിളക്കുന്ന സമയത്ത് പന്തും സ്റ്റംപും തമ്മില്‍ 'കോണ്‍ടാക്ട്' ഇല്ലാതെ പോയതോടെ അംപയര്‍ നോട്ടൗട്ട് വിളിച്ചു. തൊട്ടടുത്ത പന്തില്‍ ഫോറടിച്ചാണ് വാര്‍ണര്‍ ടീമിനു കിട്ടിയ അവസരം ആഘോഷിച്ചത്. തൊട്ടടുത്ത ഓവറില്‍ അവര്‍ വിജയറണ്ണും കുറിച്ചു.

എന്തായാലും സന്ദാകന് അബദ്ധം പിണയുന്ന വിഡിയോ സമൂഹമാധ്യമങ്ങളില്‍ വൈറലാണ്. സംഭവം മത്സര ഫലത്തില്‍ സ്വാധീനമൊന്നും ചെലുത്തിയില്ലെങ്കിലും സ്‌കൂള്‍ കുട്ടികള്‍ക്കുപോലും സംഭവിക്കുമോ ഇത്തരത്തിലുള്ള പിഴവെന്നാണ് ആരാധകരുടെ പരിഹാസം.