വിക്കറ്റ് നേട്ടം പല വിധത്തില്‍ ആഘോഷിക്കുന്ന ബൗളര്‍മാരെ കണ്ടിട്ടുണ്ടാകും. വിക്കറ്റ് കിട്ടിയതിന്റെ ആവേശത്തില്‍ കൈവിട്ട ആഘോഷങ്ങള്‍ക്കു തുനിഞ്ഞ് 'പണി' മേടിക്കുന്നവരുമുണ്ട്. എന്നാല്‍ വിക്കറ്റ് നേട്ടം ആഘോഷിക്കുന്നതിനു പകരം ഖേദം പ്രകടിപ്പിച്ച് കൈകൂപ്പുന്ന ബോളര്‍മാരെ കണ്ടിട്ടുണ്ടോ? ഇല്ലെങ്കില്‍ ഇതാ അങ്ങനെയൊരു താരം.

പാക്കിസ്ഥാനിലെ ആഭ്യന്തര ക്രിക്കറ്റ് മത്സരത്തിനിടെ സൂപ്പര്‍താരം ഫവാദ് ആലത്തെ പുറത്താക്കിയ പതിനാറുകാരന്‍ നസീം ഷായാണ് ബാറ്റ്‌സ്മാനു നേരെ കൈകൂപ്പി ഖേദം പ്രകടിപ്പിച്ചത്. സംഭവത്തിന്റെ വിഡിയോ നിമിഷങ്ങള്‍കൊണ്ട് സമൂഹമാധ്യമങ്ങളില്‍ വൈറലാവുകയും ചെയ്തു.

നസീം ഷാ 16-കാരന്‍ ആയതുകൊണ്ട് വെറും കുട്ടിയാണെന്നു കരുതരുത്. ഓസ്‌ട്രേലിയന്‍ പര്യടനത്തിനൊരുങ്ങുന്ന പാക്കിസ്ഥാന്‍ ടെസ്റ്റ് ടീമിന്റെ പ്രധാന ബോളര്‍മാരില്‍ ഒരാളാണ് ഈ പതിനാറുകാരന്‍! നസീം ഷാ പുറത്താക്കിയ ഫവാദ് ആലം പാക്ക് ആഭ്യന്തര ക്രിക്കറ്റിലെ സൂപ്പര്‍താരമാണ്. സെഞ്ചുറിയിലേക്കുള്ള കുതിപ്പില്‍ വെറും എട്ടു റണ്‍സ് മാത്രം അകലെ നില്‍ക്കെയാണ് നസീം ഷായുടെ പന്തില്‍ ഫവാദ് ആലം പുറത്തായത്.

പാക്കിസ്ഥാനിലെ പ്രമുഖ ആഭ്യന്തര ക്രിക്കറ്റ് ടൂര്‍ണമെന്റായ ഖായിദി അസം ട്രോഫിക്കിടെയാണ് സംഭവം. ടൂര്‍ണമെന്റില്‍ സെന്‍ട്രല്‍ പഞ്ചാബിന്റെ താരമാണ് നസീം ഷാ. ഫവാദ് ആലം സിന്ധ് താരവും. സിന്ധ് ഇന്നിങ്‌സില്‍ ടോപ് സ്‌കോററായ ആലം സെഞ്ചുറിക്ക് എട്ടു റണ്‍സ് അകലെ നില്‍ക്കെ വിക്കറ്റ് കീപ്പര്‍ കമ്രാന്‍ അക്മലിനു ക്യാച്ചു നല്‍കിയാണ് പുറത്തായത്. താരം പവലിയനിലേക്കു നടക്കവെ അടുത്തെത്തിയ നസീം ഷാ കൈകൂപ്പുകയായിരുന്നു. ഒന്നാം ഇന്നിങ്‌സിലാകെ 19 ഓവര്‍ എറിഞ്ഞ ഷാ 78 റണ്‍സ് മാത്രം വഴങ്ങി ആറു വിക്കറ്റ് പിഴുതു. രണ്ടാം ഇന്നിങ്‌സില്‍ 11 ഓവറില്‍ 33 റണ്‍സ് വഴങ്ങി മൂന്നു വിക്കറ്റ് കൂടി പിഴുതപ്പോഴേയ്ക്കും മത്സരം സമനിലയില്‍ അവസാനിച്ചു.

പാക്കിസ്ഥാന്‍ ജഴ്‌സിയില്‍ മൂന്നു ടെസ്റ്റും 38 ഏകദിനങ്ങളും 24 ട്വന്റി20 മത്സരങ്ങളും കളിച്ചിട്ടുള്ള ഷാ, പാക്ക് ആഭ്യന്തര ക്രിക്കറ്റിലെ മിന്നും താരമാണ്. 2015ലാണ് അവസാനമായി രാജ്യാന്തര ക്രിക്കറ്റില്‍ പാഡണിഞ്ഞത്. മൂന്നു ടെസ്റ്റില്‍നിന്ന് 41.66 ശരാശരിയില്‍ 250 റണ്‍സും 38 ഏകദിനങ്ങളില്‍നിന്ന് 40.25 ശരാശരിയില്‍ 966 റണ്‍സും 24 ട്വന്റി20യില്‍നിന്ന് 17.63 ശരാശരിയില്‍ 194 റണ്‍സും നേടിയിട്ടുണ്ട്.