കേരളത്തിൽ കാലവർഷത്തിന്റെ ആവേശം പൂർണ്ണമായും അവസാനിക്കുന്നു എന്ന സൂചനകളാണ് ഇപ്പോൾ പുറത്തുവരുന്നത്. ബംഗാൾ ഉൾക്കടലിൽ ന്യൂനമർദ്ദം രൂപപ്പെട്ടിട്ടുണ്ടെങ്കിലും കേരളത്തിൽ വരും ദിവസങ്ങളിൽ മഴ കാര്യമായി കുറയുമെന്നാണ് കേന്ദ്ര കാലാവസ്ഥാ വകുപ്പിന്റെ പ്രവചനം. പസഫിക് സമുദ്രത്തിൽ ശക്തി പ്രാപിക്കുന്ന എൽ നിനോ പ്രതിഭാസം മൺസൂണിനെ ചതിച്ചതോടെ സംസ്ഥാനത്ത് ഇതിനകം 22 ശതമാനം മഴക്കുറവാണ് രേഖപ്പെടുത്തിയിരിക്കുന്നത്. മഴ മാറി കടുത്ത ചൂടിലേക്ക് സംസ്ഥാനം നീങ്ങുമ്പോൾ, തീരദേശങ്ങളിൽ 'കള്ളക്കടൽ' പ്രതിഭാസം മൂലമുള്ള കടലാക്രമണ ഭീഷണിയും നിലനിൽക്കുന്നു.