എ ടി എം കാര്ഡിലെ വിവരങ്ങള് ചോര്ത്തിയുള്ള തട്ടിപ്പിന് തടയിടാന് 'ഡിസേബിള്' ഓപ്ഷനുമായി ബാങ്കുകള്
എ ടി എം കാര്ഡ് വഴിയുള്ള തട്ടിപ്പ് വ്യാപകമായതോടെ ഉപയോഗത്തിന് ശേഷം എ ടി എം കാര്ഡുകള് ഡിസേബിള് ചെയ്യാനുള്ള സൗകര്യം ഉപയോഗിക്കണമെന്ന് ബാങ്കുകളുടെ നിര്ദ്ദേശം. ബാങ്കുകളുടെ ആപ്ലിക്കേഷനുകള് വഴിയും നെറ്റ് ബാങ്കിങ് വഴിയും എ ടി എം കാര്ഡുകള് ഉപയോഗിച്ചുള്ള ഇടപാടുകള് നിയന്ത്രിക്കാനും താല്ക്കാലികമായി നിര്ത്തി വയ്ക്കാനും സാധിക്കും. ഇതിലൂടെ എ ടി എം കാര്ഡിലെ വിവരങ്ങള് ചോര്ത്തി പണം തട്ടിയെടുക്കുന്ന സംഭവങ്ങള് ഒഴിവാക്കാനാകുമെന്നാണ് ബാങ്കുകള് വ്യക്തമാക്കുന്നത്.
ആപ്ലിക്കേഷനുകളില് സര്വ്വീസ് റിക്വസ്റ്റ് ഓപ്ഷന് തിരഞ്ഞെടുത്ത് അതില് നിന്ന് എ ടി എം എന്ന ഓപ്ഷന് തിരഞ്ഞെടുക്കുക. തുടര്ന്ന് മാനേജ് കാര്ഡ് എന്ന ഓപ്ഷനില് പോയാല് തല്ക്കാലം ആവശ്യമില്ലാത്ത എല്ലാ ഓപ്ഷനും ഡിസേബിള് ചെയ്യാന് സാധിക്കും. കാര്ഡ് സൈ്വപ് ചെയ്തുള്ള പി ഒ എസ് ട്രാന്സാക്ഷന്, ഇ കൊമേഴ്സ് ട്രാന്സാക്ഷന്, ഡൊമസ്റ്റിക് യൂസേജ്, ഇന്റര്നാഷനല് യൂസേജ് തുടങ്ങിയവയില് ആവശ്യമില്ലാത്ത എല്ലാ സേവനങ്ങളും താല്ക്കാലികമായി നിര്ത്തിവയ്ക്കാം. ഈ സേവനങ്ങള് ആവശ്യമുള്ളപ്പോള് വീണ്ടും ആപ്ലിക്കേഷന് ഉപയോഗിച്ച് ആക്ടിവേറ്റ് ചെയ്യാനും സാധിക്കും.
ഈ സൗകര്യം മുമ്പും ആപ്ലിക്കേഷനില് ഉണ്ടായിരുന്നെങ്കിലും ഉപയോക്താക്കള് കാര്യമായി ഇത് ഉപയോഗിക്കാറില്ലായിരുന്നു. എന്നാല് എ ടി എം കാര്ഡ് വഴിയുള്ള തട്ടിപ്പ് വ്യാപകമായതോടെയാണ് ഈ സേവനം പ്രയോജനപ്പെടുത്തണമെന്ന് ബാങ്കുകള് ആവശ്യപ്പെട്ടു തുടങ്ങിയത്.
https://www.facebook.com/Malayalivartha
