ഭാരത് ഹെവി ഇലക്ട്രിക്കൽസ് ലിമിറ്റഡിലെ (ബിഎച്ച്ഇഎൽ) ജീവനക്കാർക്ക് പ്രത്യേക ശമ്പള പാക്കേജ് ആനുകൂല്യങ്ങൾ നൽകുന്നതിനായി പഞ്ചാബ് നാഷണൽ ബാങ്ക് ധാരണാപത്രം ഒപ്പുവച്ചു. ഇൻഷുറൻസ് പരിരക്ഷ, ബാങ്കിങ് സേവനങ്ങൾ, ഭവന, വിദ്യാഭ്യാസ, വാഹന വായ്‌പകൾക്ക് ഇളവുകൾ തുടങ്ങിയ ആനുകൂല്യങ്ങളാണ് പാക്കേജിലുള്ളത്. ബിഎച്ച്ഇഎല്ലിനെ പ്രതിനിധീകരിച്ച് ഡയറക്ടർ (എച്ച്ആർ) എം. ശ്രീധറും പിഎൻബിക്കായി ജനറൽ മാനേജർ (ബിഎ ആൻഡ് ആർഎം) രാജേന്ദ്ര സിങ്ങുമാണ് ധാരണാപത്രത്തിൽ ഒപ്പുവച്ചത്.

ജീവനക്കാർക്കും കുടുംബാംഗങ്ങൾക്കും ഇൻഷുറൻസ് പരിരക്ഷയ്ക്കു പുറമെ, കുട്ടികളുടെ വിദ്യാഭ്യാസം, വിവാഹം എന്നിവയുമായി ബന്ധപ്പെട്ട പ്രത്യേക പരിരക്ഷയും ലഭിക്കും. ലോക്കർ വാടകയിൽ ഇളവ്, ശമ്പളത്തിൻ്റെ അടിസ്ഥാനത്തിൽ ഓവർഡ്രാഫ്റ്റ് സൗകര്യം, കുടുംബാംഗങ്ങൾക്ക് മിനിമം ബാലൻസ് ആവശ്യമില്ലാത്ത അക്കൗണ്ടുകൾ, സൗജന്യ ബാങ്കിംഗ് സേവനങ്ങൾ, വായ്‌പകളുടെ പ്രോസസിംഗ്, ഡോക്യുമെന്റേഷൻ ചാർജുകളിൽ ഇളവ് എന്നിവയാണ് മറ്റ് ആനുകൂല്യങ്ങൾ. ആശുപത്രിവാസവുമായി ബന്ധപ്പെട്ട ഹോസ്‌പി-ക്യാഷ് ആനുകൂല്യം, കുടുംബ ബാങ്കിംഗ് സൗകര്യങ്ങൾ, സൗജന്യ ക്രെഡിറ്റ് കാർഡുകൾ എന്നിവയും ജീവനക്കാർക്ക് ലഭിക്കും.