ആധാർ നമ്പർ ബന്ധിപ്പിക്കാത്ത ഇ.പി.എഫ്. അക്കൗണ്ടുകളിലേക്ക് തൊഴിലുടമയ്ക്കോ ജീവനക്കാരനോ സെപ്റ്റംബർ ഒന്നുമുതൽ പണം നിക്ഷേപിക്കാൻ സാധിക്കില്ല. കൂടാതെ, ജീവനക്കാർക്ക് പി.എഫ്. നിക്ഷേപം പിൻവലിക്കാനും കഴിയില്ല.

എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ (ഇ.പി.എഫ്.ഒ.) ജീവനക്കാരുടെ പി.എഫ്. അക്കൗണ്ട് ആധാറുമായി ബന്ധിപ്പിച്ചിട്ടുണ്ടെന്ന് ഉറപ്പാക്കാൻ കമ്പനികൾക്ക് നിർദേശം ഇതിനോടകം കൊടുത്തു കഴിഞ്ഞു.

മേയ് 30 വരെയായിരുന്നു ഇ.പി.എഫും ആധാറും ബന്ധിപ്പിക്കുന്നതിന് സമയം നീട്ടി കൊടുത്തിരുന്നത്. എന്നാൽ പിന്നീട് ഓഗസ്റ്റ് 31 വരെ സമയം നീട്ടുകയായിരുന്നു. അങ്ങനെ ഇന്ന് സമയം അവസാനിക്കുകയാണ്.

പി.എഫ്. ആനുകൂല്യങ്ങൾ തടസ്സങ്ങളില്ലാതെ നമുക്ക് കിട്ടുവാനും അക്കൗണ്ട് വളരെ സുതാര്യമായി ഉപയോഗപ്പെടുത്താനും ആധാറുമായി ബന്ധിപ്പിക്കണം. ഇ.പി.എഫ്.ഒ.യുടെ മെംബർ സേവ പോർട്ടൽ വഴിയോ ഇ-കെ.വൈ.സി. പോർട്ടൽ വഴിയോ ആധാറും യു.എ.എന്നും ബന്ധിപ്പിക്കാം.

ലിങ്ക് ചെയ്യേണ്ടത് എങ്ങനെ എന്നുകൂടി അറിഞ്ഞിരിക്കുക;- 

വെബ് സൈറ്റ് (https://iwu.epfindia.gov.in/eKYC/) സന്ദർശിക്കുക.

ലിങ്ക് യു.എ.എൻ. ആധാർ ഓപ്ഷൻ ക്ലിക് ചെയ്യുക.

യു.എ.എൻ. നൽകി രജിസ്റ്റർ ചെയ്തിരിക്കുന്ന മൊബൈൽ നമ്പറിലേക്ക് വരുന്ന ഒ.ടി.പി. വെരിഫൈ ചെയ്യുക.

ശേഷം ആധാർ വിവരങ്ങൾ നൽകി ആധാർ വെരിഫിക്കേഷൻ മോഡ് (മൊബൈൽ ഒ.ടി.പി. അല്ലെങ്കിൽ ഇ-മെയിൽ) സെലക്ട് ചെയ്യുക.

വീണ്ടും വരുന്ന ഒ.ടി.പി. ആധാർ രജിസ്ട്രേഡ് മൊബൈൽ നമ്പറിലേക്ക് വരും. ഇത് വെരിഫൈ ചെയ്ത് ലിങ്കിങ് നടപടി പൂർത്തിയാക്കാം. സമയം പാഴാക്കാതെ വേഗത്തിൽ ചെയ്യു.