ഓഹരിവിപണിയിൽ ഇടിവ്‌. ഇന്ത്യൻ ഓഹരി സൂചികകളായ ബിഎസ്ഇ സെൻസെക്സ് 0.91 ശതമാനവും എൻഎസ്ഇ നിഫ്റ്റി 0.86 ശതമാനവും നഷ്ടം രേഖപ്പെടുത്തി.

1613 പോയിന്റിലധികം നഷ്ടത്തിൽ വ്യാപാരം തുടങ്ങിയ സെൻസെക്സ്, വ്യാപാരത്തിനിടെ ഒരുവേള 1681.93 പോയിന്റ് ഇടിഞ്ഞ് 75,868.32ലേക്കും നിഫ്റ്റി 495 പോയിന്റ് നഷ്ടത്തിൽ 23,555.60ലേക്കും താഴ്ന്നനിലയിലാണ്.

സെൻസെക്സ് ഒടുവിൽ 702.68 പോയിന്റ് നഷ്ടത്തിൽ 76847.57ലും നിഫ്റ്റി 207.95 പോയിന്റ് നഷ്ടത്തിൽ 23842.65ലുമാണ് വ്യാപാരം അവസാനിപ്പിച്ചത്.

ബിഎസ്ഇയിൽ ലിസ്റ്റ് ചെയ്ത കമ്പനികളുടെ ആകെ വിപണിമൂല്യം മുൻദിവസത്തെ 450.94 ലക്ഷം കോടിയിൽ നിന്ന്‌ 449.13 ലക്ഷം കോടിയായി കുറഞ്ഞു. 1.81 ലക്ഷം കോടിയാണ് നിക്ഷേപകർക്ക് നഷ്ടമുള്ളത്. ബിഎസ്ഇ ഓട്ടോസൂചിക 2.10 ശതമാനവും ഐടി 1.17 ശതമാനവും ഓയിൽ ആൻഡ് ഗ്യാസ് 1.25 ശതമാനവും താഴ്ന്നു.

മാരുതി സുസുകി ഓഹരി 4.61 ശതമാനവും ബജാജ് ഫിനാൻസ് 2.80 ശതമാനവും റിലൻസ് 2.64 ശതമാനവും നഷ്ടം നേരിട്ടു. കൊച്ചി കപ്പൽശാല (2.01), ഇന്റർഗ്ലോബ് ഏവിയേഷൻ (2.78), ടിസിഎസ് (2.05), എച്ച്ഡിഎഫ്സി ബാങ്ക് (2.02), അദാനി പോർട്സ് (0.78) എന്നിവയാണ് നഷ്ടത്തിൽ വ്യാപാരം അവസാനിപ്പിച്ച മറ്റ് ചില പ്രധാന ഓഹരികളായുള്ളത്.