സഹകരണ ബാങ്കുകളും സംഘങ്ങളും സ്വര്‍ണപ്പണയത്തിന്മേല്‍ വായ്പ നല്‍കുന്നതു സര്‍ക്കാര്‍ വിലക്കി. സഹകരണ സ്ഥാപനങ്ങളിലെ സ്വര്‍ണപ്പണയ ഇടപാടുകളില്‍ വ്യാപകമായ ക്രമക്കേടുകള്‍ കണ്ടെത്തിയത്തിന്റെ പശ്ചാത്തലത്തിലാണ് പുതിയ നിയമം. സ്വര്‍ണപ്പണയ വായ്പ സംബന്ധിച്ച നിബന്ധനകള്‍ കര്‍ശനമാക്കികൊണ്ടുള്ള ഉത്തരവ് കഴിഞ്ഞ ദിവസം പുറത്തിറങ്ങി.സഹകരണ വകുപ്പ് നടത്തിയ അന്വേഷണത്തില്‍ വായ്പയുടെ ബന്ധപ്പെട്ട് നിയമലംഘനം നടന്നതായി കണ്ടെത്തിയിരുന്നു. 

സ്വര്‍ണപ്പണയ ഇടപാട് നടത്തുന്ന സ്വകാര്യ സ്ഥാപനങ്ങള്‍ക്കോ അവയുടെ ഉടമസ്ഥര്‍ക്കോ സ്വര്‍ണപ്പണയ വായ്പ നല്‍കരുത്. പണയമായി എടുക്കുന്ന ഉരുപ്പടികളുടെ ആകെ കമ്പോളവിലയുടെ പത്തു ശതമാനത്തില്‍ കൂടിയ തുകയ്ക്ക് ഇന്‍ഷുറന്‍സ് കവറേജ് ഏര്‍പ്പെടുത്തണം. സ്വര്‍ണപ്പണയ വായ്പ നല്‍കുന്ന സംഘങ്ങളിലും ബാങ്കുകളിലും മതിയായ സ്‌ട്രോങ് റൂം സംവിധാനം വേണം. 

സംഘങ്ങളിലെ ജീവനക്കാര്‍ക്ക് ആ സംഘത്തില്‍ അംഗമാകാന്‍ കഴിയാത്തതിനാല്‍ അവര്‍ക്കു സ്വര്‍ണപ്പണയ വായ്പ നല്‍കരുത്. സ്വര്‍ണപ്പണയ ഉരുപ്പടികളുടെ കമ്പോളവിലയുടെ 75 ശതമാനത്തില്‍ കൂടുതല്‍ തുക വായ്പ നല്‍കരുത്. 

വായ്പക്കാരില്‍ നിന്ന് അെ്രെപസര്‍ ചാര്‍ജ്, ഇന്‍ഷുറന്‍സ് ചാര്‍ജ്, ഫോറം വില തുടങ്ങിയ ഇനത്തില്‍ ഈടാക്കാവുന്ന മിനിമം തുക 50 രൂപയാണ്. ഒരു ലക്ഷം രൂപ വരെയുള്ള വായ്പയ്ക്ക് 250 രൂപയും മൂന്നു ലക്ഷം വരെ 300 രൂപയും അഞ്ചു ലക്ഷം വരെ 400 രൂപയും ഏഴു ലക്ഷം വരെ 500 രൂപയും 10 ലക്ഷം വരെ 700 രൂപയും അതിനു മുകളില്‍ 1,000 രൂപയും മാത്രമേ ഈടാക്കാവൂ.

പണയ ഉരുപ്പടികള്‍ ആറു മാസത്തിലൊരിക്കല്‍ വിദഗ്ധ അെ്രെപസര്‍മാരെക്കൊണ്ടു പരിശോധിപ്പിച്ച് എണ്ണം, തൂക്കം, പരിശുദ്ധി എന്നിവ ഉറപ്പുവരുത്തണം. പരിശോധനയില്‍ ക്രമക്കേട് കണ്ടെത്തിയാല്‍ ക്രിമിനല്‍ സ്വഭാവമുള്ളതാണെങ്കില്‍ പൊലീസില്‍ പരാതിപ്പെട്ടു ക്രിമിനല്‍ കേസ് ചാര്‍ജ് ചെയ്തുവെന്ന് ഉറപ്പുവരുത്തണം.