ഭൂമിക്കപ്പുറത്ത് ജീവന്റെ സാധ്യതകൾ തേടുന്ന ശാസ്ത്ര ലോകത്തിന് പ്രതീക്ഷയേകുന്ന ഒരു വാർത്ത കിട്ടിയിരിക്കുന്നു. നമ്മുടെ ‘കയ്യെത്തും ദൂരത്തുള്ള’ നക്ഷത്രസമൂഹങ്ങളിലൊന്നിൽ, ഭൂമിയുടെ സവിശേഷതകൾ ഉൾക്കൊള്ളുന്ന മറ്റൊരു ഗ്രഹം ഉണ്ടാകാനുള്ള സാധ്യത ശാസ്ത്രജ്ഞർ വെളിപ്പെടുത്തി . ഇന്ത്യൻ വംശജൻ ഉൾപ്പെടുന്ന ശാസ്ത്രജ്ഞരുടെ സംഘമാണ്
ഇങ്ങനെയൊരു സാധ്യത ചൂണ്ടിക്കാട്ടിയത്.

ഭൂമിയുള്‍പ്പെടുന്ന നക്ഷത്ര സമൂഹമായ ആകാശഗംഗയിൽനിന്ന് 16 പ്രകാശ വർഷങ്ങൾ മാത്രം അകലെയുള്ള മറ്റൊരു നക്ഷത്ര സമൂഹത്തിലാണ് ഭൂമിയോടു സാദൃശ്യമുള്ള ഗ്രഹം ഉള്ളതെന്നാണ് കണ്ടെത്തൽ. യുഎസിലെ ആർലിങ്ടണിലുള്ള യൂണിവേഴ്സിറ്റി ഓഫ് ടെക്സാസിലെ ശാസ്ത്രസംഘമാണ് ഈ കണ്ടെത്തലിനു പിന്നിൽ.

ഭൂമിയുടെ പിണ്ഡത്തിന്റെ 15 മടങ്ങുവരെ പിണ്ഡം ഈ ഗ്രഹത്തിനുണ്ടാകുമെന്നാണ് കണക്കുകൂട്ടലെന്ന് ശാസ്ത്രജ്ഞരുടെ സംഘത്തിലെ ഇന്ത്യൻ വംശജനായ സുമൻ സത്യാൽ അറിയിച്ചു. ഗ്ലെയിസ് 832 എന്ന നക്ഷത്രക്കൂട്ടത്തിലാണ് ഈ ഗ്രഹമുള്ളത്. റെഡ് ഡ്വാർഫ് മേഖലയിൽ നൂറുവർഷത്തിലധികം സ്ഥായിയായ ഭ്രമണപഥത്തിൽ തുടരാൻ ആ ഗ്രഹത്തിനു കഴിഞ്ഞുവെന്ന് ശാസ്ത്രസംഘം ചൂണ്ടിക്കാട്ടുന്നു.