പാമ്പ് എന്നും ഒരു പേടിസ്വപ്നം തന്നെയാണ് നമുക്ക് ഏവർക്കും. എന്നാൽ അതിന്റെ സൗന്ദര്യത്തെ നിരീക്ഷിച്ചിട്ടുണ്ടോ ആരെങ്കിലും. പേടികാരണം പലരും ശ്രദ്ധിക്കാറില്ല. വഴുവഴുത്ത പ്രതലമായതിനാല്‍ തൊടാന്‍ അറപ്പു തോന്നുമെങ്കിലും പാമ്പിന്റെ നിറവും ഡിസൈനുകളും ആരുടെയും ശ്രദ്ധ ആകർഷിക്കാൻ പോന്നവയാണ്.

ചൈനയില്‍ മാത്രം കണ്ടു വരുന്ന ചേരയുടെ ഗണത്തില്‍ പെട്ട പേള്‍ ബ്രാന്‍ഡഡ് ആണ് പാമ്പുകള്‍ക്കിടയിലെ സൗന്ദര്യധാമമായി കണക്കാക്കുന്നത്. ഈ ഇനത്തിലെ 20 ല്‍ താഴെ പാമ്പുകളെ മാത്രമെ ഇതുവരെ കണ്ടെത്തിയതായി രേഖകളുള്ളൂ. ലോകത്തെ അപൂര്‍വയിനം പാമ്പുകളില്‍ ഒന്ന് എന്ന ബഹുമതിയും പേള്‍ ബ്രാന്‍ഡഡ് നു തന്നെ.

ഇങ്ങനെയൊക്കെയാണെങ്കിലും അതിജീവനത്തിനുള്ള ഇവയുടെ കഴിവ് വളരെ പരിതാപകരമാണ്. ഇവയുടെ പ്രത്യുൽപാദനശേഷിയും വളരെ കുറവാണ്. അഞ്ചോ ആറോ വര്‍ഷത്തിലൊരിക്കലാണ് ഈ ഗണത്തിൽപ്പെട്ട പെൺപാമ്പുകൾ മുട്ടയിടുന്നത്. ഇടുന്ന മുട്ടകള്‍ തന്നെ ഇതുവരെ വിരിഞ്ഞതായി ഗവേഷകര്‍ കണ്ടെത്തിയിട്ടില്ല. 1929 ല്‍ ചൈനയിലെ സിങ്ചുവാ പ്രദേശത്തു നിന്നാണ് ഈ പാമ്പിനെ ആദ്യമായി കണ്ടെത്തിയത്.

ഡോ ഡിങ് ലീയുടെ നേതൃത്വത്തിൽ ചൈനയിലെ ചൈനീസ് അക്കാദമി ഓഫ് സയന്‍സ്, സെഷ്വാന്‍ ഫോറസ്റ്ററി അക്കാദമി എന്നിവര്‍ ചേര്‍ന്ന് സംയുക്തമായി ഈ പാമ്പിന്റെ മുട്ട വിരിയിച്ചെടുക്കുവാനുള്ള ശ്രമത്തിലാണ്. 2014ല്‍ ലാബാ നേച്ചര്‍ റിസേര്‍വില്‍ നിന്നു ലഭിച്ച ആണ്‍ പാമ്പും പെണ്‍ പാമ്പും ഇണ ചേര്‍ന്നതിനെ തുടര്‍ന്നാണ് മുട്ടകള്‍ ലഭിച്ചത്. മൂന്നു വര്‍ഷത്തെ കാത്തിരിപ്പിന് ശേഷമാണ് ഇവ തമ്മില്‍ ഇണ ചേര്‍ന്നതും മുട്ടകളിട്ടതും. ഗവേഷകരുടെ കയ്യിൽ ഇപ്പോൾ അഞ്ച് മുട്ടകളാണ് വിരിയാനുള്ളത്.

പലപ്പോഴും പെണ്‍ പാമ്പുകള്‍ അടയിരിക്കാന്‍ താല്‍പ്പര്യമില്ലാതെ മുട്ട ഉപേക്ഷിക്കുന്നതാണ് മുട്ട വിരിയാതിരിക്കാനുള്ള കാരണം എന്ന് കണ്ടെത്തിയതോടെ കയ്യിലുള്ള മുട്ടകളെ കൃത്രിമമായി വിരിയിച്ചെടുക്കുവാനാണ് ഗവേഷകരുടെ ശ്രമം. ഈ ശ്രമം വിജയിച്ചാല്‍ ലോകത്തെ ഏറ്റവും സൗന്ദര്യമുള്ള പാമ്പു വര്‍ഗ്ഗത്തെ ഭൂമിയില്‍ നിലനിര്‍ത്താനാകുമെന്നാണ് പ്രതീക്ഷിക്കുന്നത്.