ഇന്നത്തെ തിരക്കേറിയ ജീവിത സാഹചര്യത്തിൽ മാനസിക സംഘർഷം ഉണ്ടാവുക സാധാരണമാണല്ലോ? ജോലിയും തിരക്കും ആഹാരരീതിയുമെല്ലാം നമ്മളിൽ സ്ട്രെസ് ഉളവാക്കുന്നു. എന്നാൽ മാനസിക പിരിമുറുക്കം അനുഭവപ്പെടുമ്പോൾ നമ്മൾ ഇഷ്ടപെടുന്ന കാര്യങ്ങളിൽ മനസ് വ്യാപൃതമാക്കാൻ ശ്രമിക്കുകയാണെങ്കിൽ സ്ട്രെസ് കുറക്കാൻ സാധിക്കും. അതായത് വീട്ടിൽ ഒരു പൂച്ചയോ നായയെ ഒക്കെ ഉണ്ടെങ്കിൽ അവയെ താലോലിക്കുന്നത് മാനസിക പിരിമുറുക്കത്തിന് അയവു വരുത്താൻ സഹായിക്കും.

ഇത്തരത്തിൽ മാനസിക സംഘർഷം കുറയ്ക്കാനായി ജാപ്പനീസ് കമ്പനിയായ യുക്കായി എന്‍ജിനിയറിങ്ങ് ഒരു തലയില്ലാ പൂച്ചയെ വിപണിയില്‍ ഇറക്കിയിരിക്കുകയാണ്. ആര്‍ട്ടിഫിഷ്യല്‍ ഇന്റലിജന്‍സിന്റെ സഹായത്തോടെ ആണ് ഈ തലയില്ലാ പൂച്ചയെ അവതരിപ്പിച്ചിരിക്കുന്നത്. കൂബോ എന്നാണ് ഇതിന്റെ പേര്. തലോടുമ്പോൾ വാൽ ഇളക്കിയാണ് തിരികെ സ്നേഹം പ്രകടിപ്പിക്കുന്നത്.

തലയില്ലാത്ത പതുപതുത്ത കുഷ്യനുകള്‍ കൊണ്ട് നിര്‍മ്മിച്ചിരിക്കുന്നതും നമ്മുടെ തലോടലിന് അനുസരിച്ച് വാലാട്ടുന്നതുമായ ഒരു കുഷ്യനാണ് ഈ ജാപ്പനീസ് കമ്പനി തയ്യാറാക്കിയിരിക്കുന്നത്. ആവശ്യാനുസരണം ചാർജ് ചെയ്ത് ഉപയോഗിക്കാവുന്ന രീതിയിൽ ആണിത് രൂപകല്പന ചെയ്തിരിക്കുന്നത്. 8 മണിക്കൂർ വരെ ചാർജ് നിൽക്കുകയും ചെയ്യും. യുഎസ്ബി വഴി ചാർജ് ചെയ്യുന്നതിനാൽ യാത്രാവേളയിലും കൂടെകൂട്ടാം എന്നതും ഇതിന്റെ ഒരു സവിശേഷതയാണ്.

2018 ജൂണില്‍ വിപണിയില്‍ ഇറക്കാനാണ് കമ്പനി ഉദ്ദേശിക്കുന്നത്. ഇതിന് നൂറ് ഡോളറാണ് (ഇന്ത്യൻ രൂപയിൽ ഏകദേശം ഏഴായിരത്തോളം) വിലയിട്ടിട്ടുള്ളത്.