ജ്യോതിശാസ്ത്ര മേഖലയിൽ വിപ്ലവകരമായ ഒരു കണ്ടുപിടുത്തവുമായി കലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ ഗവേഷകർ. നവഗ്രഹങ്ങൾ ഉണ്ടായിരുന്ന സൗരയൂഥത്തിൽ നിന്നും പ്ലൂട്ടോയെ കുള്ളൻ ഗ്രഹം ആക്കി തരംതാഴ്ത്തിയ ശേഷം ഉണ്ടായ ഒരു പ്രധാന കണ്ടുപിടുത്തം കൂടിയാണിത്. എന്താന്നല്ലേ? സൗരയൂഥത്തിലെ എട്ടാമത്തെ ഗ്രഹമായ നെപ്ട്യൂണിനും ഏറെ അപ്പുറത്ത്, ഒരു കൂറ്റൻ ഗ്രഹം ഉണ്ട് എന്നതാണ് ഈ പുതിയ കണ്ടുപിടുത്തം.

നെപ്ട്യൂണിൽ നിന്നും വളരെ അകലെയായി നോക്കെത്താദൂരത്തു ആണ് ഇതിന്റെ സ്ഥാനം എങ്കിലും സൗരയൂഥത്തിലെ ഗ്രഹങ്ങളുടെ സ്ഥാനത്തെ വരെ സ്വാധീനിക്കാൻ തക്ക ശക്തിയുള്ളതാണ് ഇത് എന്നാണ് ഗവേഷകരുടെ നിഗമനം.
മാത്രവുമല്ല ഗ്രഹങ്ങളുടെയും മറ്റ് ബാഹ്യാകാശ വസ്തുക്കളുടെയും ചലനങ്ങളെ സ്വാധീനിക്കുന്നതിലും ഇവയ്ക്ക് പങ്കുണ്ട്. പ്ലാനറ്റ് 9 എന്നാണ് ഈ ഗ്രഹത്തിന് നാമകരണം ചെയ്തിരിക്കുന്നത്. സൂര്യനും നെപ്ട്യൂണിനും ഇടയിലുള്ള അകലത്തേക്കാൾ പത്തുമടങ്ങ് ദൂരെയാണ് പുതിയ ഗ്രഹത്തിന്റെ സ്ഥാനമെന്നാണ് കലിഫോർണിയ ഇൻസ്റ്റിറ്റ്യൂട്ട് ഓഫ് ടെക്നോളജിയിലെ രണ്ട് ഗവേഷകർ തങ്ങളുടെ പഠന റിപ്പോർട്ടിലൂടെ വെളിപ്പെടുത്തുന്നത്.

ഭൂമിയെക്കാൾ 10 മടങ്ങ് വലിപ്പം ഉണ്ട് പ്ലാനറ്റ് 9 നു എന്നാണ് ശാസ്ത്ര മതം. കോൺസ്റ്റന്റൈൻ ബാറ്റിജിൻ എന്ന ഗവേഷകനാണ് ഒൻപതാം അദൃശ്യ ഗ്രഹമുണ്ടെന്ന റിപ്പോർട്ടുമായി രംഗത്തെത്തിയത്. ഇദ്ദേഹത്തിനൊപ്പമുള്ള മൈക് ബ്രൗൺ, ആണ് പ്ലൂട്ടോയ്ക്ക് ഗ്രഹങ്ങളുടെ സ്വഭാവമില്ലെന്നും സൗരയൂഥത്തിൽ നിന്നു പുറത്താക്കി കുള്ളൻ ഗ്രഹമായി ‘തരംതാഴ്ത്തണ’മെന്നും ആദ്യമായി ആവശ്യപ്പെട്ടത്. പ്ലാനറ്റ് 9 എന്നത് ആദ്യം ഒരു ഊഹം മാത്രമായിരുന്നു. എന്നാൽ ഇന്ന് അങ്ങനെയല്ല. അതിനെ സാധൂകരിക്കുന്ന അഞ്ചോളം തെളിവുകളുമായാണ് ഇത്തവണ അദ്ദേഹം രംഗപ്രവേശം ചെയ്തിരിക്കുന്നത്.

നെപ്ട്യൂണിനപ്പുറത്തുള്ള ബാഹ്യാകാശ വസ്തുക്കളുടെ നിരീക്ഷണത്തിലൂടെയാണ് ഗവേഷകർ എങ്ങനെ ഒരു പ്രസ്താവനയിൽ എത്തിയത്. ഇവരെക്കൂടാതെ ധാരാളം പേർ പ്ലാനറ്റ് 9 നെ നിരീക്ഷിക്കാനായി രംഗത്തുണ്ട്. എങ്കിലും ഇതുവരെ ലഭിച്ച വിവരങ്ങളെ കൃത്യമായി അപഗ്രഥിച്ചെടുത്താൽ മാത്രമേ പ്ലാനറ്റ് 9 സത്യമോ മിഥ്യയോ എന്ന് അറിയാൻ കഴിയൂ. ഇനിയും മരീചികയായി തുടരുന്ന ഈ ഗ്രഹത്തിന്റെ സാന്നിധ്യം കൂടുതലായി അറിയാനുള്ള ശ്രമത്തിലാണ് ഗവേഷകർ. എന്തായാലും നമുക്ക് കാത്തിരുന്ന് കാണാം. പ്ലാനറ്റ് 9 പ്ലൂട്ടോക്ക് പകരക്കാരനാകുമോ എന്നറിയാനും നമുക്കു കാത്തിരിക്കാം.