ദക്ഷിണേന്ത്യയിലെ ആദ്യ സയന്‍സ് സിറ്റിയുടെ കവാട നിര്‍മാണം അന്തിമഘട്ടത്തില്‍
അറിവിന്റെയും വിനോദത്തിന്റെയും വിസ്മയക്കാഴ്ചകള്‍ ഒരുക്കുന്ന ദക്ഷിണേന്ത്യയിലെ ആദ്യ സയന്‍സ് സിറ്റിയുടെ കവാട നിര്‍മാണം അന്തിമഘട്ടത്തില്‍. കുറവിലങ്ങാടിനു സമീപം കോഴായില്‍ എംസി റോഡരികില്‍ ആര്‍ക്കിടെക്റ്റ് ശങ്കറിന്റെ രൂപരേഖയില്‍ നിര്‍മിക്കുന്ന കവാടം കാഴ്ചയില്‍ ഏറെ വ്യത്യസ്തമാണ്. ഹാബിറ്റാറ്റിനാണ് നിര്‍മാണച്ചുമതല. ഇതിന്റെ രൂപരേഖ തയാറാക്കിയത് ആര്‍ക്കിടെക്റ്റ് ശങ്കര്‍ കോഴായില്‍ നേരിട്ടെത്തിയാണ്.
നാലര വര്‍ഷം മുന്‍പാണ് സയന്‍സ് സിറ്റിയുടെ നിര്‍മാണത്തിനു തുടക്കം കുറിച്ചതെങ്കിലും എംസി റോഡ് വികസനത്തിനായി സ്ഥലം ഏറ്റെടുത്തശേഷമാണ് കവാട നിര്‍മാണം ആരംഭിച്ചത്. ടിക്കറ്റ് കൗണ്ടര്‍ ഉള്‍പ്പെടെയുള്ളവ ഇവിടെയാണ് പ്രവര്‍ത്തിക്കുക. ജോസ് കെ. മാണി എംപിയുടെ ശ്രമഫലമായി കേരളത്തിനു ലഭിച്ച സയന്‍സ് സിറ്റിയുടെ ആദ്യഘട്ടം അടുത്തവര്‍ഷം മേയ് മാസത്തില്‍ പൂര്‍ത്തിയാവും.
കോഴായില്‍ ജില്ലാ കൃഷിത്തോട്ടത്തില്‍നിന്നു കൈമാറി ലഭിച്ച 30 ഏക്കര്‍ സ്ഥലത്തു ദക്ഷിണേന്ത്യയിലെ ആദ്യത്തേതും രാജ്യത്തെ നാലാമത്തേതുമായ സയന്‍സ് സിറ്റിയുടെ നിര്‍മാണ ജോലികള്‍ അതിവേഗം പുരോഗമിച്ചു കൊണ്ടിരിക്കയാണ്. സംസ്ഥാന സര്‍ക്കാരില്‍നിന്നു ലഭിച്ച ഫണ്ട് ഉപയോഗപ്പെടുത്തി തയ്യാറാക്കുന്ന സ്‌പേസ് തിയറ്ററിന്റെ നിര്‍മാണം അന്തിമഘട്ടത്തിലാണ്.
പ്രവേശന കവാടത്തിനൊപ്പം മോഷന്‍ സിമുലേറ്റര്‍, ആംഫി തിയറ്റര്‍ എന്നിവയുടെ നിര്‍മാണവും താമസിയാതെ പൂര്‍ത്തിയാവും. നിര്‍മാണ ജോലികള്‍ വിലയിരുത്താനും പരിശോധിക്കാനും എച്ച്എല്‍എല്‍ എന്ന കേന്ദ്രസര്‍ക്കാര്‍ സ്ഥാപനത്തെ ചുമതലപ്പെടുത്തിയിട്ടുണ്ട്. അടിസ്ഥാനസൗകര്യ വികസന ജോലികളുടെ ചുമതല ഹാബിറ്റാറ്റിനാണ്.
https://www.facebook.com/Malayalivartha
