ക്ലോണിങ്ങിന്റെ പാതയിൽ ഇന്ന് നാം ഒത്തിരി മുന്നേറിക്കഴിഞ്ഞു. എന്താണ് ക്ലോണിംഗ് ? ഒരേ ജനിതക ഘടനയുള്ള രണ്ടു ജീവികളെ ലൈംഗിക ബന്ധം കൂടാതെ സൃഷ്ടിക്കുക എന്നതാണ് ക്ലോണിങ്ങിലൂടെ അർഥമാക്കുന്നത്. ഇത് എങ്ങനെയാണു സാധ്യമാകുന്നത് ? അറിയാമോ? അതായത് സ്വാഭാവിക പ്രത്യുത്പാദനമാർഗങ്ങളുടെ പിറകെ പോകാതെ ജീവികളുടെ കോശകേന്ദ്രം ഒരു ഭ്രൂണത്തിലേക്ക് സം‌യോജിപ്പിച്ച് കോശകേന്ദ്രത്തിന്റെ ഉടമയായ ജീവിയുടെ തനിപ്പകർപ്പിനെ സൃഷ്ടിക്കുകയാണ് ക്ലോണിങ്ങ് വഴി ഉദ്ദേശിക്കുന്നത്. ഇവിടെ ക്ലോണിങ്ങിലൂടെ ഒരു പുതിയ വിജയഗാഥ രചിക്കുകയാണ് ചൈനയിലെ ഗവേഷകർ.

ലോകത്തിൽ ആദ്യമായി ക്ലോണിങ്ങ് ചെയ്യപ്പെട്ട ജീവി ഡോളി എന്ന ചെമ്മരിയാട് ആണല്ലോ.എന്നാൽ രണ്ടാഴ്ച വ്യത്യാസത്തിൽ രണ്ടു കുരങ്ങൻമാരെ ആണ് ഇത്തവണ ക്ലോണിങ്ങിലൂടെ ഗവേഷക സംഘം സൃഷ്ടിച്ചിരിക്കുന്നത്. ഈ കണ്ടുപിടുത്തത്തിന്റെ മാറ്റു കൂട്ടുന്ന ഒരു പ്രത്യേകത കൂടി ഉണ്ട്. അതായത് മനുഷ്യനും കുരങ്ങുകളും ഉള്‍പ്പെടുന്ന (പ്രൈമേറ്റ് വിഭാഗത്തില്‍) പെട്ട ജീവിയെ ക്ലോണിങ്ങിലൂടെ സൃഷ്ടിക്കുന്നത് ഇതാദ്യമാണ് എന്നതാണ് പ്രത്യേകത.
പ്രൈമേറ്റ് വിഭാഗത്തിൽപ്പെട്ട ഒരു ജീവിയെ പുനഃസൃഷ്ടിക്കുക വഴി മനുഷ്യനെയും ക്ലോണിങ്ങിലൂടെ സൃഷ്ടിക്കാം എന്ന് ചിന്തിക്കേണ്ടിയിരിക്കുന്നു. എന്തെന്നാൽ ജനിതകമായി മനുഷ്യനും കുരങ്ങുകളും ധാരാളം സാമ്യങ്ങൾ പുലർത്തുന്നുണ്ട്. അതുകൊണ്ടുതന്നെ കുരങ്ങുകളിൽ വിജയകരമായി ക്ലോണിങ്ങ് നടത്തിയപക്ഷം മനുഷ്യരിലും ഇത് സാധ്യമാക്കാൻ എളുപ്പമാണെന്നാണ് ഗവേഷകരുടെ അഭിപ്രായം. എന്നാൽ ഇത്തരത്തിൽ പ്രൈമേറ്റ് കളെ പരീക്ഷിച്ചത് ശാസ്ത്ര ലോകത്തോട് ചെയ്ത പൊറുക്കാനാവാത്ത കുറ്റമെന്നാണ് പാശ്ചാത്യലോകത്തെ ഗവേഷകരുടെ ആരോപണം.
സിംഗിള്‍ സെല്‍ ന്യൂക്ലിയര്‍ ട്രാന്‍സ്ഫര്‍ വഴിയാണ് കുരങ്ങുകളെ ക്ലോൺ ചെയ്തത്. ഈ രീതിയിൽ മനുഷ്യനെയും ക്ലോണിങ് വിധെയമാക്കിയാൽ അത് വലിയ വിപത്തുകൾ ക്ഷണിച്ചു വരുത്തും എന്ന് നാം മറക്കരുത്.