ഉദ്യോഗാർത്ഥികൾ ഏറെ കാത്തിരുന്ന കമ്പനി/കോർപറേഷൻ/ബോർഡ് അസിസ്റ്റന്റ് പരീക്ഷ മേയ് 12 ന് ആയിരിക്കുമെന്ന് പി എസ്‌ സി അറിയിച്ചു. കെഎസ്എഫ്ഇ, കെഎസ്ഇബി തുടങ്ങിയവയിലേക്കും (കാറ്റഗറി നമ്പർ 399/2017), കെഎസ്ആർടിസി, ലൈവ്സ്റ്റോക്ക് ഡവലപ്മെന്റ് ബോർഡ് തുടങ്ങിയവയിലേക്കും (കാറ്റഗറി നമ്പർ 400/2017) പൊതു പരീക്ഷ ആയിരിക്കും.

ഇലക്ട്രിക്കൽ ആൻഡ് അലൈഡ് എൻജിനീയറിങ് കമ്പനിയിൽ ജൂനിയർ അസിസ്റ്റന്റ്– സ്പെറി. എസ്‌ടി (കാറ്റഗറി നമ്പർ 396/2017), ഇൻഫർമേഷൻ ആൻഡ് പബ്ലിക് റിലേഷൻസിൽ അസിസ്റ്റന്റ് ഇൻഫർമേഷൻ ഒാഫിസർ (കാറ്റഗറി നമ്പർ 534/2017) തസ്തികകളിലേക്കുള്ള പരീക്ഷയും ഇതോടൊപ്പം നടത്താൻ തീരുമാനിച്ചിട്ടുണ്ട്.
പരീക്ഷ സമയം ഉച്ചക്ക് 1 -30 മുതൽ 3 -15 വരെ ആയിരിക്കും.

ഈ പ്രാവശ്യം മുതൽ കമ്പനി/കോർപറേഷൻ/ബോർഡ് അസിസ്റ്റന്റ് പരീക്ഷയുടെ സിലബസിൽ മലയാളഭാഷയിൽ നിന്നുള്ള 10 ചോദ്യങ്ങൾ പ്രതീക്ഷിക്കാം. ബിരുദനിലവാരത്തിലുള്ള പരീക്ഷകളിൽ ഉൾപ്പെടുത്തിയിരുന്ന സാമൂഹികക്ഷേമ പദ്ധതികൾ എന്ന വിഷയം ഒഴിവാക്കിയാണ് മലയാള ചോദ്യങ്ങൾ ഉൾപ്പെടുത്തിയത്. ഭാഷാന്യൂനപക്ഷങ്ങൾക്ക് തമിഴിലും കന്നടയിലും ചോദ്യങ്ങൾ ലഭ്യമാക്കും.
സിലബസിനെ 10 മേഖലകളായാണ് തരംതിരിച്ചിട്ടുള്ളത് . ഇവ ഓരോന്നിലും നിന്നും 10 ചോദ്യങ്ങൾ വീതം പരീക്ഷയിൽ ഉൾപ്പെടുത്തും.
ബിരുദനിലവാരത്തിലുള്ള പരീക്ഷകൾക്ക് പ്രാഥമിക, മെയിൻ പരീക്ഷകൾ നടത്തുമെന്ന സൂചനകൾ ഉണ്ടായിരുന്നെങ്കിലും ഇത്തവണയും ഒബ്ജക്ടീവ് പരീക്ഷയുടെ മാത്രം അടിസ്ഥാനത്തിലാണ് തിരഞ്ഞെടുപ്പ് പൂർത്തിയാക്കുന്നത്.

കമ്പനി/കോർപറേഷൻ/ബോർഡ് അസിസ്റ്റന്റ് പരീക്ഷയുടെ ഹാൾടിക്കറ്റ് ഉദ്യോഗാർഥികൾ ഏപ്രില്‍ 22നകം ഡൗൺലോഡ് ചെയ്യണം. അപേക്ഷകർക്ക് ഏപ്രില്‍ എട്ടു മുതൽ 22 വരെ തങ്ങളുടെ ഒറ്റത്തവണ റജിസ്ട്രേഷനിൽ ഹാൾടിക്കറ്റ് ലഭ്യമാക്കും. ഇത് ഏപ്രിൽ 22 രാത്രി 12നകം ജനറേറ്റ് ചെയ്തിരിക്കണം. അല്ലാതെയുള്ളവർക്ക് ഹാൾടിക്കറ്റ് ലഭിക്കില്ല. വിവിധ തസ്തികകൾക്ക് അപേക്ഷ നൽകിയ ശേഷം ധാരാളം ഉദ്യോഗാർഥികൾ പരീക്ഷ എഴുതാതിരിക്കുന്നത് പിഎസ്‌സിക്ക് വലിയ സാമ്പത്തിക ബാധ്യത ഉണ്ടാക്കുന്ന സാഹചര്യത്തിലാണ് ഈ പരീഷ്ക്കാരം ഏർപ്പെടുത്തിയിരിക്കുന്നത്.

കമ്പനി/കോർപറേഷൻ/ബോർഡ് അസിസ്റ്റന്റ് തസ്തികയുടെ രണ്ടു കാറ്റഗറികളിലുമായി 11,98,405 പേരാണ് അപേക്ഷ നൽകിയിരിക്കുന്നത് കെഎസ്എഫ്ഇ, കെഎസ്ഇബി, തൃശൂർ കോർപറേഷൻ തുടങ്ങിയ സ്ഥാപനങ്ങളിലേക്ക് 6,03,496 പേരും കെഎസ്ആർടിസി, ലൈവ്സ്റ്റോക്ക് ഡവലപ്മെന്റ് ബോർഡ്, ഫാമിങ് കോർപറേഷൻ തുടങ്ങിയവയിലേക്ക് 5,94,909 പേരും അപേക്ഷ നൽകിയിട്ടുണ്ട്.
സെക്രട്ടേറിയറ്റ്/പിഎസ്‌സി തുടങ്ങിയവയിൽ അസിസ്റ്റന്റ് തസ്തികയിലേക്കുള്ള പരീക്ഷ ജൂണിൽ നടത്തുമെന്നും സൂചനയുണ്ട്. കമ്പനി/കോർപറേഷൻ/ബോർഡ് അസിസ്റ്റന്റ് തസ്തികയുടെ അതേ സിലബസിൽ തന്നെയാണ് സെക്രട്ടേറിയറ്റ് അസിസ്റ്റന്റ് പരീക്ഷയും നടത്തുക