കോളിവുഡില്‍ ഏറ്റവും കൂടുതല്‍ ആരാധകരുള്ള താരജോഡികളാണ് വിജയ്‌യും തൃഷയും. 2004ലെ സൂപ്പര്‍ഹിറ്റ് ചിത്രമായ ഗില്ലിയിലൂടെയാണ് ഇവരുടെ കെമിസ്ട്രി ശ്രദ്ധിക്കപ്പെടുന്നത്. പിന്നീട് പുറത്തിറങ്ങിയ തിരുപ്പാച്ചി, ആദി, കുരുവി എന്നീ ചിത്രങ്ങളിലൂടെ ഇവരുടെ ജോഡിക്ക് ആരാധകര്‍ വര്‍ദ്ധിച്ചു. 2008ല്‍ പുറത്തിറങ്ങിയ കുരുവിക്ക് ശേഷമാണ് ഇരുവരും തമ്മില്‍ അടുത്ത ബന്ധമുണ്ടെന്ന തരത്തില്‍ കഥകള്‍ പുറത്തുവന്ന് തുടങ്ങിയത്.

എന്നാല്‍ കുരുവിക്കുശേഷം പെട്ടെന്ന് ഇരുവരും ഒരുമിച്ച് അഭിനയിക്കുന്നത് അവസാനിപ്പിച്ചു. ഇത് അഭ്യൂഹങ്ങള്‍ കൂടുതല്‍ ശക്തമാക്കാനിടയാക്കി. കുരുവിക്കുശേഷം തൃഷയോടൊത്ത് അഭിനയിക്കരുതെന്ന് വിജയ്‌യുടെ കുടുംബം ആവശ്യപ്പെട്ടുവെന്നും ഇതാണ് ഇരുവരും അകലാന്‍ കാരണമെന്ന തരത്തിലും കഥകള്‍ പ്രചരിച്ചു. എന്നാല്‍ തങ്ങള്‍ സുഹൃത്തുക്കള്‍ മാത്രമാണെന്ന് വ്യക്തമാക്കിയ താരങ്ങള്‍ അഭ്യൂഹങ്ങള്‍ തള്ളുകയും ചെയ്തു.

15 വര്‍ഷങ്ങള്‍ക്കുശേഷം 'ലിയോ' എന്ന സിനിമയിലൂടെയാണ് ആരാധകരെ ഞെട്ടിച്ചുകൊണ്ട് വിജയ്‌യും തൃഷയും വീണ്ടും ഒരുമിച്ചത്. സിനിമയുടെ പ്രൊമോഷന്‍ സമയത്ത് ഇവര്‍ പരിപാടികള്‍ക്ക് ഒന്നിച്ചെത്തുകയും സമൂഹമാദ്ധ്യമങ്ങളില്‍ ചിത്രങ്ങള്‍ പങ്കുവയ്ക്കുകയും ചെയ്തിരുന്നു. വിജയ്‌യുടെ ജന്മദിനാഘോഷത്തിനിടെ തൃഷ പങ്കുവച്ച ചിത്രം വീണ്ടും പ്രണയകഥകള്‍ പ്രചരിക്കാനിടയാക്കി.

ഇതിനുപിന്നാലെ 2026 ഫെബ്രുവരിയിലാണ് വിജയ്‌യുടെ ഭാര്യ സംഗീത വിവാഹമോചനം ആവശ്യപ്പെട്ട് കോടതിയില്‍ ഹര്‍ജി നല്‍കിയത്. വിജയ്ക്ക് മറ്റൊരു നടിയുമായി ബന്ധമുണ്ടെന്നും അതിനാല്‍ വിവാഹമോചനം ആവശ്യമാണെന്നുമാണ് ഹര്‍ജിയില്‍ ആവശ്യപ്പെട്ടിരിക്കുന്നത്. എന്നാല്‍ ആരോപണവിധേയായ നടി ആരാണെന്ന് ഹര്‍ജിയില്‍ പറയുന്നില്ല. എന്നാലിത് തൃഷ ആണെന്നാണ് പലരും വിശ്വസിക്കുന്നത്.