കമ്പ്യൂട്ടറിനു മുന്നിൽ ഇരുന്നുള്ള ജോലിയുള്ളവർക്കെല്ലാം കാണുന്ന അസുഖമാണ് കഴുത്തുവേദന . തല വേദനയും നടുവേദനയും കഴിഞ്ഞാന്‍ ലോകത്തിലേറ്റവുമധികം ആളുകള്‍ ചികിത്സ തേടുന്നത് കഴുത്ത് വേദനയ്ക്കാണ്. ഇത് ചിലപ്പോള്‍ മറ്റ് ചില രോഗങ്ങളുടെയും ലക്ഷണവുമാകാം. പലപ്പോഴും ഇത്തരം രോഗങ്ങള്‍ വരുന്നത് അശ്രദ്ധയും ജീവിതശൈലിയിലേ മാറ്റവും കൊണ്ടാണ്.

സ്വാഭാവികമായി കുറേ സമയം കംപ്യൂട്ടറിന്റെ മുമ്പിലിരുന്നു കഴിഞ്ഞാല്‍ കഴുത്തിനും പുറത്തുമെല്ലാം വേദനയുണ്ടാകും. കംപ്യൂട്ടറിന്റെ അമിതമായ ഉപയോഗവും, തെറ്റായ രീതിയിലുള്ള ഇരിപ്പ്, വ്യായാമത്തിന്റെ അഭാവം ഇവയെല്ലാം കഴുത്ത് വേദനക്കു കാരണമാകാം.

അധികനേരം വണ്ടിയോടിക്കുന്നവരിലും ഫോണ്‍ അധികം ഉപയോഗിക്കുന്നവര്‍, കിടന്നുകൊണ്ട് ടിവി കാണുന്നവര്‍, കിടന്നുവായിക്കുന്നവര്‍, സ്ഥിരമായി യാത്രചെയ്യുന്നവര്‍ ഇവരെല്ലാം ഈ പ്രശ്നം അനുഭവിക്കുന്നവരാണ്.

വളരെ ഉയര്‍ന്നതോ തീരെ താഴ്ന്നതോ ആയ തലയണ വച്ച് ഉറങ്ങുന്നവരിലും കഴുത്ത് വേദനയുണ്ടാകാറുണ്ട്. കൈകളില്‍ മുഖം താങ്ങി ദീര്‍ഘനേരം ഇരിക്കുന്നവരിലും കഴുത്തുവേദന വരാം. മുടി പുറകിലേക്ക് ഉയർത്തി കെട്ടിവെക്കുന്നവരിലും കഴുത്തു വേദന വരാറുണ്ട്.

കഴുത്ത് വല്ലപ്പോഴും ഉളുക്കുന്നതും വേദനിക്കുന്നതും സ്വാഭാവികമാണെങ്കിലും വേദന രണ്ടുമൂന്നു ദിവസങ്ങൾ കഴിഞ്ഞു വിട്ടുമാറാതിരുന്നാൽ ശ്രദ്ധിക്കണം.
ഹാര്‍ട്ട് അറ്റാക്ക്, പേശികള്‍ പെട്ടുന്നത് , എല്ല് പൊടിയുന്നത്, കാന്‍സര്‍ ഇത്തരം രോഗങ്ങളുടെ പ്രാരംഭ ലക്ഷണമാണ് കഴുത്ത് വേദന, കുടാതെ ക്ഷയം, ‍അര്‍ബുദമല്ലാത്ത മുഴകള്‍, ജന്‍മനാലുള്ള വൈകല്യങ്ങള്‍ തുടങ്ങിയവയും കഴുത്ത് വേദനയുണ്ടാക്കും.മാനസിക സമ്മർദ്ദവും കഴുത്തു വേദനക്ക് കാരണമാകാറുണ്ട്.

ആവശ്യത്തിനുള്ള ശ്രദ്ധനല്‍കിയില്ലെങ്കില്‍ ഇത്തരം രോഗങ്ങള്‍ അപകടമായി മാറുന്നതായിരിക്കും. കഴുത്ത് വേദനയുടെ പ്രാഥമിക ചികിത്സ വിശ്രമമാണ്. കഴുത്ത് വേദന വര്‍ധിപ്പിക്കുന്ന പ്രവൃത്തികള്‍ ഉടന്‍ നിര്‍ത്തിവയ്ക്കണം. ഒപ്പം വേദനസംഹാരികള്‍ കഴിക്കുകയും ചെയ്യാം.ഐസ് കട്ട തുണിയിൽ പൊതിഞ്ഞു വേദനയുള്ള ഭാഗത്ത് വെക്കുന്നതും ഇളം ചൂടുവെള്ളം തുണിയിൽ മുക്കി വെക്കുന്നതും നല്ലതാണ് .കർപ്പൂര തൈലം പുരട്ടി ആവി പിടിക്കുന്നതും കഴുത്തു വേദനക്ക് ആശ്വാസം നൽകും.