ഏഷ്യന്‍ സ്ട്രോക്ക് സമ്മര്‍ സ്കൂള്‍ നവംബര്‍ 12 മുതല്‍15 വരെ തിരുവനനന്തപുരത്ത്: ശ്രീചിത്ര തിരുനാള്‍ ഇന്‍സ്റ്റിറ്റ്യൂട്ടും ബെണ്‍ സര്‍വകലാശാലയും ചേര്‍ന്നാണ്പരിപാടി സംഘടിപ്പിക്കുന്നത്...
11 NOVEMBER 2026 04:51 PM IST
മലയാളി വാര്‍ത്ത
തിരുവനന്തപുരം ശ്രീചിത്ര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സസ് ആന്‍ഡ് ടെക്നോളജിയും (എസ് സിടിഐഎംഎസ് ടി) സ്വിറ്റ്സര്‍ലന്‍ഡിലെ ബെണ്‍ സര്‍വകലാശാലയും സംയുക്തമായാണ് പരിപാടി സംഘടിപ്പിക്കുന്നത്.
എഷ്യയിലെ വിവിധ രാജ്യങ്ങളില്‍ പക്ഷാഘാത ചികിത്സ കൂടുതല്‍ മെച്ചപ്പെടുത്തുകയും ന്യൂറോളജിസ്റ്റുകള്‍ക്കും ഇന്‍റര്‍വെന്‍ഷണലിസ്റ്റുകള്‍ക്കും ഒരുമിച്ച് പരിശീലനം നല്‍കുകയുമാണ് പരിപാടിയുടെ ലക്ഷ്യം. യൂറോപ്യന്‍ സ്ട്രോക്ക് വിന്‍റര്‍ സ്കൂളിന്‍റെ മാതൃകയിലാണ് പരിപാടി രൂപകല്‍പ്പന ചെയ്തിരിക്കുന്നത്.
പക്ഷാഘാത ചികിത്സയിലെ പുതിയ രീതികള്‍, രോഗികള്‍ക്ക് അനുയോജ്യമായ ചികിത്സ തിരഞ്ഞെടുക്കുന്നതിനുള്ള ആധുനിക ഇമേജിങ് സാങ്കേതികവിദ്യകള്‍ എന്നിവയില്‍ പരിപാടിയില്‍ പരിശീലനം നല്‍കും. രക്തക്കുഴലുകളിലെ തടസം നീക്കം ചെയ്യുന്ന മെക്കാനിക്കല്‍ ത്രോംബെക്ടമി ചികിത്സാ രീതിക്ക് പരിപാടിയില്‍ പ്രത്യേക പ്രാധാന്യം നല്‍കും.
ചികിത്സാ തീരുമാനങ്ങള്‍ എടുക്കല്‍, ചികിത്സയ്ക്കിടെ ഉണ്ടാകുന്ന സങ്കീര്‍ണതകള്‍ കൈകാര്യം ചെയ്യല്‍, ചികിത്സയ്ക്ക് മുമ്പും ശേഷവുമുള്ള പരിചരണം, ചികിത്സയുടെ ഗുണനിലവാരം ഉറപ്പാക്കല്‍ തുടങ്ങിയ വിഷയങ്ങളില്‍ ചര്‍ച്ച നടക്കും.
രോഗികളുടെ ചികിത്സയുമായി ബന്ധപ്പെട്ട അനുഭവങ്ങള്‍ പങ്കുവെയ്ക്കുന്നതിനും ചര്‍ച്ചകള്‍ നടത്തുന്നതിനും അവസരമുണ്ടാകും. പക്ഷാഘാത ചികിത്സ കൂടുതല്‍ കാര്യക്ഷമമാക്കുന്നതിനും വിവിധ വിഭാഗങ്ങള്‍ തമ്മിലുള്ള സഹകരണം വികസിപ്പിക്കുന്നതിനുമുള്ള മാര്‍ഗങ്ങളും ചര്‍ച്ച ചെയ്യും.
തിരുവനന്തപുരം എസ് സിടിഐഎംഎസ് ടിയിലെ കോംപ്രിഹെന്‍സീവ് സ്ട്രോക്ക് കെയര്‍ പ്രോഗ്രാം പ്രൊഫസറും മേധാവിയുമായ ഡോ. പി.എന്‍ സില്‍ജ, സ്വിറ്റ്സര്‍ലന്‍ഡിലെ ബെണ്‍ ഇന്‍സെല്‍സ്പിറ്റല്‍ യൂണിവേഴ്സിറ്റി ഹോസ്പിറ്റല്‍ ന്യൂറോളജി വിഭാഗം ഡയറക്ടറും ചെയര്‍മാനുമായ ഡോ. ഉര്‍സ് ഫിഷര്‍, തിരുവനന്തപുരം എസ് സിടിഐഎംഎസ് ടിയിലെ ഇമേജിങ് സയന്‍സസ് ആന്‍ഡ് ഇന്‍റര്‍വെന്‍ഷണല്‍ റേഡിയോളജി വിഭാഗം പ്രൊഫസറും മേധാവിയുമായ ഡോ. ഇ. ആര് ജയദേവന്‍, ബെണ്‍ ഇന്‍സെസ്പിറ്റല്‍ ന്യൂറോസെന്‍ററിലെ ന്യൂറോറേഡിയോളജി വിഭാഗം മേധാവി ഡോ. ജാന്‍ ഗ്രാല എന്നിവരാണ് പരിപാടിയുടെ ഡയറക്ടര്‍മാര്‍.
നവംബര്‍ 13 ന് ഒ ബൈ താമരയില്‍ നടക്കുന്ന ഔപചാരിക ഉദ്ഘാടന ചടങ്ങില്‍ നേവി മെഡിക്കല്‍ സര്‍വീസസ് ഡയറക്ടര്‍ ജനറല്‍ സര്‍ജന്‍ വൈസ് അഡ്മിറല്‍ ശങ്കര്‍ സുബ്രഹ്മണ്യന്‍ മുഖ്യാതിഥിയായിരിക്കും. മുന്‍ ചീഫ് സെക്രട്ടറി ഡോ. ജിജി തോംസണ്‍ വിശിഷ്ടാതിഥിയാകും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെ ഫേസ്‌ബുക്ക്‌ പേജ് LIKE ചെയ്യുക
https://www.facebook.com/Malayalivartha
https://www.facebook.com/Malayalivartha
