സ്ത്രീകളെയും പുരുഷന്‍മാരേയും ഒരുപോലെ അലട്ടുന്ന പ്രശ്‌നമാണ് മുടികൊഴിച്ചില്‍. മുടികൊഴിച്ചില്‍ ഏറെയും പ്രശ്‌നങ്ങളുണ്ടാക്കുന്നത് പുരുഷന്മാരിലാണ്. ഈ പ്രശ്‌നം പരിഹരിക്കാന്‍ എത്ര പണം ചെലവാക്കാനും ആളുകള്‍ക്ക് മടിയില്ല. ചെറുപ്പത്തിലേ മുടി കൊഴിയുന്നത് കഷണ്ടിയടക്കമുള്ള അവസ്ഥകളിലേക്ക് അവരെ എത്തിക്കുകയും ചെയ്യും. അല്‍പമൊന്ന് ശ്രദ്ധിച്ചാല്‍ ഒരു പരിധിവരെ മുടികൊഴിച്ചില്‍ തടയാം. വളരെ ലളിതമായ ചില കാര്യങ്ങള്‍ ചെയ്താല്‍മതി.

മുടിയുടെ ആരോഗ്യത്തിനു ഏറെക്കുറെ ഉത്തമമായ ഒന്നാണ് വെളുത്തുള്ളി. വെളുത്തുള്ളി ജ്യൂസ് രൂപത്തിലാക്കി തലയില്‍ നന്നായി തേച്ചുപിടിപ്പിക്കുക. രാത്രി കിടക്കും മുന്‍പ് ഇത്തരത്തില്‍ ചെയ്ത് രാവിലെ ഷാംപു ഉപയോഗിച്ചു കഴുകി കളയുന്നതും മുടികൊഴിച്ചില്‍ തടയുമെന്നാണ് വിദഗ്ദര്‍ പറയുന്നത്. അതുപോലെ ഉള്ളിയോ സവാളയോ ജ്യൂസ് രൂപത്തിലാക്കി തലയില്‍ പുരട്ടുന്നതും മുടികൊഴിച്ചില്‍ തടയാന്‍ സഹായിക്കും. അതുപോലെ പുതിയ മുടിയിഴകള്‍ കിളിര്‍ക്കുന്നതിനും ഇത് ഉത്തമ ഔഷധമാണ്.

ശരീര സംരക്ഷണത്തിന് മാത്രമല്ല മുടിയെ പരിചരിക്കാനും ഉത്തമമായ ഒന്നാണ് ഗ്രീന്‍ ടീ. ഗ്രീന്‍ ടീയില്‍ അടങ്ങിയിരിക്കുന്ന ആന്റിഓക്‌സിഡന്റുകള്‍ മുടി പിളരുന്നതിനെ തടയും. ഒരുകപ്പു വെള്ളത്തില്‍ രണ്ടു ഗ്രീന്‍ ടീ ബാഗിട്ട് തിളപ്പിച്ച് അത് ചൂടാറിയതിനു ശേഷം തലയില്‍ തേച്ചു പിടിപ്പിച്ച് ഒരുമണിക്കൂര്‍ കഴിഞ്ഞു കഴുകിക്കളയുകയാണ് വേണ്ടത്. പേരയ്ക്കയിലകളില്‍ വിറ്റാമിന്‍ ബി ധാരളമായി അടങ്ങിയിട്ടുണ്ട്. ഇത് മുടിക്ക് ഏറെ ഗുണകരമാണ്. പേരയ്ക്കയില വെള്ളത്തിലിട്ട് തിളപ്പിച്ച് കഷായമാക്കി തലയില്‍ തേക്കുന്നത് നല്ലതാണ്.

തലയില്‍ എണ്ണയിട്ട് നല്ലതുപോലെ മസാജ് ചെയ്യുന്നതു മുടിയുടെ ആരോഗ്യത്തിനു ഏറെ നല്ലതാണ്. മുടിയിഴകളിലേക്ക് രക്തയോട്ടം കൂടുന്നതിനും തുടര്‍ന്ന് മുടി കൊഴിഞ്ഞുപോകുന്ന സ്ഥിതി ഇല്ലാതാക്കുന്നതിനും ഇതു സഹായകമാകും. അതുപോലെ തലയിലെ ഇന്‍ഫെക്ഷന്‍, താരന്‍ എന്നിവ മാറ്റുന്നതിനും ഇതു സഹായിക്കും. മുട്ട, ചിക്കന്‍, പയര്‍ വര്‍ഗങ്ങള്‍ എന്നിവയെല്ലാം പ്രോട്ടീന്‍ സമ്പുഷ്ടമാണ്. ഇത്തരം ഭക്ഷണങ്ങള്‍ ശീലമാക്കുന്നതു മുടികൊഴിച്ചില്‍ തടയാന്‍ സഹായിക്കും.