ബെംഗളൂരു മഹാവീർ ജെയിൻ ഇൻസ്റ്റിറ്റ്യൂട്ടില്‍ ആണ് കൗതുകകരമായ ഈ സംഭവം നടന്നത്. യുവസംഗീതജ്ഞനും ഗിറ്റാറിസ്റ്റുമായ 32 കാരനായ ടെക്കി യുവാവാണ് തലച്ചോര്‍ തുരന്നുള്ള അതി സങ്കീര്‍ണ്ണമായ ശസ്ത്രക്രിയയ്ക്കിടയില്‍ ഗിറ്റാര്‍ വായിച്ച രോഗി.

ഡിസ്റ്റോണിയ (എല്ലിന്റെ ചലനങ്ങള്‍ക്കുണ്ടാകുന്ന രോഗം) ബാധിച്ച് ഗിറ്റാര്‍ വായിക്കുമ്പോള്‍ ഇടതു കയ്യിലെ മൂന്നു വിരലുകൾ അനങ്ങാതായതിനെ തുടർന്നായിരുന്നു ശസ്ത്രക്രിയ.തലച്ചോറിലെ പ്രശ്‌നമുള്ള ഞരമ്പുകള്‍ കരിയിച്ചു കളയുന്നതായിരുന്നു ചികിത്സ.

വിരലുകൾ ചലിപ്പിക്കുമ്പോൾ തലച്ചോറിലെ ഏതു ഭാഗത്താണു പ്രശ്നമെന്നു കണ്ടെത്താനാണ് ഓപ്പറേഷൻ ടേബിളിൽ രോഗിയെക്കൊണ്ടു ഗിറ്റാർ വായിപ്പിച്ചതെന്നു ഡോക്ടർമാർ അറിയിച്ചു. ചെറിയതോതില്‍ അനസ്തീഷ്യ നല്‍കി തലയുടെ ഭാഗം മാത്രം മരവിപ്പിച്ച ശേഷമായിരുന്നു ഏഴു മണിക്കൂർ നീണ്ട ശസ്ത്രക്രിയ. തലയോട്ടിയിൽ 14 മില്ലിമീറ്റർ ദ്വാരമുണ്ടാക്കി അതിലൂടെ ഇലക്ട്രോഡ് കടത്തിവിട്ടാണു പ്രശ്നമുള്ള ഞരമ്പുകളെ ചികിൽസിച്ചതെന്നു ഡോ.ശരൺ ശ്രീനിവാസൻ പറഞ്ഞു.

ഗിറ്റാര്‍ വായിക്കുമ്പോഴാണ് രോഗിക്ക് ഈ പ്രശ്‌നം അഭിമുഖീകരിക്കേണ്ടി വരുന്നത് എന്നതിനാല്‍ ശസ്ത്രക്രിയ ചെയ്യുമ്പോള്‍ അതിന്റെ ഫലം അപ്പപ്പോള്‍ ഡോക്ടര്‍മാര്‍ക്ക് അറിയേണ്ടിയിരുന്നുവെന്ന് യുണിവേഴ്‌സിറ്റി ഓഫ് ബ്രിട്ടിഷ് കൊളംബിയയിലെ സീനിയര്‍ ന്യൂറോളജിസ്റ്റ് സി.സി. സഞ്ജീവ് അറിയിച്ചു.
ശസ്ത്രക്രിയയ്ക്കു മുന്‍പായി പ്രത്യേകമായി നിര്‍മിച്ച ഫ്രെയിം നാല് സ്‌ക്രൂവിന്റെ സഹായത്തോടെ രോഗിയുടെ തലയില്‍ ഘടിപ്പിക്കുകയായിരുന്നു. ഇതുവഴി എംആര്‍ഐ സ്‌കാന്‍ നടത്തി. ഒന്‍പതു സെന്റീമീറ്ററോളം ആഴത്തിലായിരുന്നു പ്രശ്‌ന ബാധിതമായ ഞരമ്പ്. തലയോട്ടിയില്‍ എവിടെ തുരന്ന് ശസ്ത്രക്രിയ ചെയ്യണമെന്നും എംആര്‍ഐയില്‍ നിന്നു വ്യക്തമായി.

ശസ്ത്രക്രിയയ്ക്കുശേഷം മൂന്നാം ദിവസം പൂര്‍ണാരോഗ്യത്തോടെ ഇയാള്‍ ആശുപത്രി വിട്ടു. ശസ്ത്രക്രിയ ടേബിളില്‍ വച്ചുതന്നെ തനിക്കു കൈവിരലുകള്‍ അനായാസം ചലിപ്പിക്കാനായെന്ന് യുവാവ് പ്രതികരിച്ചു.