പാല്‍ ഒരു സമീകൃത ആഹാരമാണെന്ന് എല്ലാവര്‍ക്കും അറിയാം. എന്നാല്‍ ആരോഗ്യവിദഗ്ധര്‍ പറയുന്നത് ഒരു വയസ്സില്‍ താഴെ പ്രായമുള്ള കുഞ്ഞുങ്ങള്‍ക്ക് പശുവിന്‍പാല്‍ നല്‍കുന്നത് ഒഴിവാക്കണമെന്നാണ്. പശുവിന്‍പാല്‍ നല്കുന്നത് കുഞ്ഞിന് അലര്‍ജിയുണ്ടാവാനും ശ്വസന,ദഹന വ്യവസ്ഥകളില്‍ അണുബാധയുണ്ടാവാനും കാരണമാകുമെന്ന പഠനറിപ്പോര്‍ട്ടുകളെ തുടര്‍ന്നാണിത്. ആവശ്യത്തിന് മുലപ്പാല്‍ ഇല്ലാതെ വരുന്ന അവസ്ഥകളില്‍ കുഞ്ഞുങ്ങള്‍ക്ക് പശുവിന്‍ പാല്‍ നല്കാറുണ്ട്. ഇന്ത്യയുടെ ഗ്രാമപ്രദേശങ്ങളിലാണ് ഈ പതിവ് കൂടുതലായും കണ്ടുവരുന്നത്.

ഒരു വയസ്സാകും മുമ്പ് കുഞ്ഞുങ്ങള്‍ക്ക് പശുവിന്‍ പാല്‍ ദഹിക്കാന്‍ പ്രയാസമാണ്. ഇതില്‍ ഇരുമ്പിന്റെ അംശം കുറവായതുകൊണ്ട് വിളര്‍ച്ചയുണ്ടാവാനുള്ള സാധ്യതയും കൂടുതലാണ്. ദഹനപ്രക്രിയ സുഗമമാകാതെ വരുന്നതോടെ കുഞ്ഞിന്റെ കിഡ്‌നിയെ പോലും പാലിന്റെ ഉപയോഗം ദോഷകരമായി ബാധിക്കുമെന്നും പറയപ്പെടുന്നു. പശുവിന്‍ പാല്‍ കുഞ്ഞുങ്ങളില്‍ അലര്‍ജിയുണ്ടാക്കാനുള്ള സാധ്യത കൂടുതലാണെന്നാണ് പഠനങ്ങള്‍ പറയുന്നത്. പശുവിന്‍ പാലിലടങ്ങിയിരിക്കുന്ന ഉയര്‍ന്ന അളവിലുള്ള പ്രോട്ടീനാണ് കുഞ്ഞുങ്ങളില്‍ അലര്‍ജിക്ക് കാരണമാകുക. എക്‌സിമ പോലെയുള്ള ത്വക് രോഗങ്ങളോ ശ്വാസം മുട്ടലോ ഒക്കെ ഇതുമൂലം ഉണ്ടാവാം. വയറിളക്കം,ഛര്‍ദ്ദില്‍ തുടങ്ങിയവയും അലര്‍ജിയുടെ ലക്ഷണങ്ങളായി കണക്കാക്കാവുന്നതാണ്.