പല നിറത്തിലും രൂപത്തിലുമുളള ടാറ്റുകള്‍ ഇന്ന് ഫാഷനായി മാറിയിട്ടുണ്ട്. എന്നാല്‍ ശരീരത്തില്‍ ടാറ്റു വരയ്ക്കുന്നത് ആരോഗ്യത്തിന് അത്ര നല്ലതല്ലെന്നാണ് വിദഗ്ധര്‍ അഭിപ്രായപ്പെടുന്നത്. ഇത് രോഗ പ്രതിരോധ ശേഷിയെ കാര്യമായി ബാധിക്കുമെന്നാണ് പഠനങ്ങള്‍ പറയുന്നത്. ജര്‍മനി കേന്ദ്രമായി പ്രവര്‍ത്തിക്കുന്ന യൂറോപ്യന്‍ സിങ്ക്രോട്ട്രോന്‍ റേഡിയേഷന്‍ ഫെസിലിറ്റിയിലെ ഗവേഷകര്‍ നടത്തിയ പഠനത്തിലും ടാറ്റു മഷിയിലൂടെ ടൈറ്റാനിയം ഡയോക്‌സൈഡ് ശരീരത്തിലെത്തിയതായി കണ്ടെത്തിയിട്ടുണ്ട്. ശരീരത്തിലെ ലിംഫ് നോഡുകളിലും ഇത് കണ്ടെത്തി. ടാറ്റു ചെയ്ത ഭാഗങ്ങളിലെ കോശങ്ങളില്‍ ഉണ്ടായ മാറ്റങ്ങളും ഇന്‍ഫ്രാറെഡ് സ്‌പെക്ട്രോസ്‌കോപ്പിയിലൂടെ ഗവേഷകര്‍ തിരിച്ചറിഞ്ഞു. ടാറ്റുവിന്റെ നിറം ലിംഫ്‌നോഡുകളിലും പ്രതിഫലിച്ചതായാണ് നിരീക്ഷണം.

ജേര്‍ണല്‍ സയിന്റിഫിക് റിപ്പോര്‍ട്ട്‌സിലാണ് ഇതു സംബന്ധിച്ച് പഠനങ്ങള്‍ പ്രസിദ്ധീകരിച്ചിട്ടുള്ളത്. ടാറ്റു ചെയ്യുമ്പോള്‍ മഷിയോടൊപ്പം ശരീരത്തിലെത്തുന്ന വിഷമയമുള്ള വസ്തുക്കളാണ് ശരീരത്തിന്റെ പ്രവര്‍ത്തനങ്ങളെ താളം തെറ്റിക്കുക. ഇന്ന് ശരീരത്തില്‍ ടാറ്റു ചെയ്യുന്ന ആള്‍ക്കാര്‍ നിരവധിയാണെങ്കിലും ഇതിനുപയോഗിക്കുന്ന നിറങ്ങളില്‍ എന്തൊക്കെയാണുള്ളതെന്ന് ഭൂരിഭാഗം പേര്‍ക്കും അറിയില്ല. സാധാരണ നിറങ്ങള്‍ക്കു പുറമെ നിക്കല്‍, ക്രോമിയം, മാംഗനീസ്, കോബാള്‍ട്ട് എന്നിവയുടെ അംശങ്ങളും ടാറ്റുവിലൂടെ ശരീരത്തിലെത്തും. ടൈറ്റാനിയം ഡയോക്‌സൈഡ് എന്ന ചായക്കൂട്ടാണ് നിറം കഴിഞ്ഞാല്‍ ടാറ്റു ചെയ്യാന്‍ ഉപയോഗിക്കുന്ന മറ്റൊരു ഘടകം. ഷേഡുകളും മറ്റും ഉണ്ടാക്കാനാണ് ഇതുപയോഗിക്കുന്നതെന്നാണ് ഗവേഷകര്‍ പറയുന്നത്. പെയിന്റുകളുടെ നിര്‍മാണത്തിലും ടൈറ്റാനിയം ഡയോക്‌സൈഡ് ഉപയോഗിക്കാറുണ്ട്.