നെഞ്ച് വേദന അനുഭവപ്പെട്ട് ആശുപത്രിയില്‍ എത്തിക്കുന്ന ഒരാള്‍ക്ക് ആദ്യം നടത്തുന്ന ടെസ്റ്റ് ഇസിജിയാണ്. എന്നാല്‍ ഇസിജി പരിശോധനയിലൂടെ ഹൃദ്രോഗം ഉറപ്പിക്കാനാകുമോ? ഈ ചോദ്യത്തിന് കൃത്യമായ ഒരു മറുപടി നല്‍കാന്‍ ഡോക്ടര്‍മാര്‍ക്ക് സാധിക്കില്ല എന്നതാണ് വസ്തുത.

ഇസിജി നോര്‍മലായവര്‍ക്ക് ഹൃദ്രോഗം ഉണ്ടെന്ന് പിന്നീട് കണ്ടെത്താം. ഇസിജിയില്‍ കുഴപ്പമുണ്ടെന്ന് വിധിയെഴുതിയവര്‍ക്ക് കാര്യമായ ഹൃദ്രോഗം ഇല്ലെന്നും കണ്ടെത്താറുണ്ട്. ഇസിജി പരിശോധനയുടെ ആധികാരികതയെക്കുറിച്ച് ഒന്നു പരിശോധിക്കാം.

ഇസിജിയില്‍ പ്രധാനമായും ഹൃദയത്തിന്റെ മിടിപ്പ്, മുമ്പ് ഹൃദയാഘാതം സംഭവിച്ചിട്ടുണ്ടോ എന്നീ കാര്യങ്ങളാണ് അറിയാന്‍ സാധിക്കുന്നത്. പെട്ടെന്നുണ്ടാകുന്ന നെഞ്ചുവേദന ഹൃദയാഘാതമാണോയെന്ന് അറിയാനും ഇസിജി സഹായിക്കും.

എന്നാല്‍ സ്ഥിരമായി ഇസിജി പരിശോധന നടത്തുന്നതിലൂടെ ഹൃദയ വാല്‍വുകളിലെ ബ്ലോക്ക് കണ്ടെത്താനാകില്ല. അതിന് എക്കോ കാര്‍ഡിയോഗ്രാം(അള്‍ട്രാസൗണ്ട് സ്‌കാന്‍) മുതലായ ടെസ്റ്റുകള്‍ നടത്തേണ്ടതുണ്ട്.

ഈ ടെസ്റ്റില്‍നിന്ന് ഹൃദയത്തിന്റെ പമ്പിങ്, മുമ്പ് ഹൃദയാഘാതം വന്നിട്ടുണ്ടോ എന്നീ കാര്യങ്ങളില്‍ വ്യക്തത വരുത്താന്‍ സാധിക്കും. എന്നാല്‍ ഹൃദയവാല്‍വുകളില്‍ ബ്ലോക്ക് ഉണ്ടോയെന്ന് കൃത്യമായി ഉറപ്പിക്കാന്‍ ടിഎംടി, ആന്‍ജിയോഗ്രാം ടെസ്റ്റുകള്‍ ചെയ്യേണ്ടിവരും.