ദേശീയ ആയുര്‍വേദ ദിനത്തോടനുബന്ധിച്ച് (നവംബര്‍ 5) സംസ്ഥാന വ്യാപകമായി ഒരു മാസക്കാലത്തോളം നീണ്ടുനില്‍ക്കുന്ന നിരവധി പരിപാടികള്‍ ആയുഷ് വകുപ്പ് സംഘടിപ്പിച്ചിരിക്കുന്നു. വിവിധ വകുപ്പുകള്‍, സംഘടനകള്‍, സ്ഥാപനങ്ങള്‍ എന്നിവയുമായി സഹകരിച്ച് സെമിനാറുകള്‍, മെഡിക്കല്‍ ക്യാമ്പുകള്‍, ബോധവത്ക്കരണ പരിപാടികള്‍, സ്‌കൂള്‍ തല പരിപാടികള്‍, ഔഷധസസ്യ പ്രദര്‍ശനം, വാക്കത്തോണ്‍ എന്നിവയാണ് സംഘടിപ്പിക്കുന്നത്. ഭാരതീയ ചികിത്സാ വകുപ്പും നാഷണല്‍ ആയുഷ് മിഷനുമാണ് പരിപാടികള്‍ക്ക് നേതൃത്വം നല്‍കുന്നത്.

'പൊതുജനാരോഗ്യം ആയുര്‍വേദത്തിലൂടെ' എന്നതാണ് ഈ വര്‍ഷത്തെ വിഷയം. ദിനാചരണത്തിന്റെ സംസ്ഥാനതല ഉദ്ഘാടനം നവംബര്‍ 5ന് കണ്ണൂര്‍ ചേമ്പര്‍ ഓഫ് കൊമേഴ്‌സ് ഹാളില്‍ വച്ച് രാവിലെ 11 മണിക്ക് ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര്‍ നിര്‍വഹിക്കുന്നു. തുറമുഖ, മ്യൂസിയം, പുരാവസ്തു വകുപ്പ് മന്ത്രി രാമചന്ദ്രന്‍ കടന്നപ്പള്ളി ചടങ്ങില്‍ അധ്യക്ഷത വഹിക്കും. ദിനാഘോഷത്തിന്റെ ഭാഗമായി മെഗാ മെഡിക്കല്‍ ക്യാമ്പും സംഘടിപ്പിക്കുന്നു.

സംസ്ഥാനതല സെമിനാര്‍

'പൊതുജനാരോഗ്യ സംരക്ഷണത്തില്‍ ആയുര്‍വേദത്തിന്റെ പങ്ക്' എന്ന വിഷയത്തില്‍ തിരുവനന്തപുരം ചൈത്രം ഹോട്ടലില്‍ വെച്ച് 2018 നവംബര്‍ 3 ന് സംസ്ഥാനതല സെമിനാര്‍ സംഘടിപ്പിക്കുന്നു. സംസ്ഥാന ആസൂത്രണ ബോര്‍ഡ് അംഗവും പൊതുജനാരോഗ്യ വിദഗ്ധനുമായ ഡോ. ബി. ഇക്ബാല്‍ സെമിനാറിന്റെ ഉദ്ഘാടനം നിര്‍വ്വഹിക്കുന്നു. ആയുര്‍വേദ മേഖലയിലെ പൊതുജനാരോഗ്യ സംരക്ഷണ പരിപാടികളുമായി ബന്ധപ്പെട്ട പ്രബന്ധങ്ങള്‍ ഈ സെമിനാറില്‍ അവതരിപ്പിക്കുന്നതാണ്. വകുപ്പുതലവന്‍മാരും ഈ മേഖലയിലെ വിദഗ്ധരും സെമിനാറില്‍ പങ്കെടുക്കുന്നു.

സ്‌കൂള്‍ തല ആരോഗ്യ ബോധവത്കരണ പരിപാടികളും
ആയുഷ് ക്ലബ് രൂപീകരണവും

സ്‌കൂള്‍ കുട്ടികള്‍ക്കായി ആരോഗ്യ ബോധവത്കരണ പരിപാടികളും ഇതോടൊപ്പം ആയുഷ് വകുപ്പ് നടത്തുന്നു. ആയുര്‍വേദം അനുശാസിക്കുന്ന നല്ല ആരോഗ്യ ശീലങ്ങളും ആഹാരശീലങ്ങളും മറ്റും പരമാവധി പ്രചരിപ്പിക്കുന്നതിനും അങ്ങനെ ഒരു നല്ല തലമുറയെ വാര്‍ത്തെടുക്കുന്നതിന് ആയുര്‍വേദ അറിവുകള്‍ പ്രയോജനപ്പെടുത്താനും സാധിക്കും. ആരോഗ്യവുമായി ബന്ധപ്പെട്ട അറിവുകളും മറ്റും നിരന്തരം പ്രചരിപ്പിക്കുന്നതിനും വിദ്യാര്‍ത്ഥികള്‍ക്ക് ആരോഗ്യം സംബന്ധിച്ച് ബോധവല്കരണ പരിപാടികള്‍ നടത്തുന്നതിനും ആയുഷ് ക്ലബ് എന്ന ഒരു സ്ഥിരം സംവിധാനം ആയുഷ് വകുപ്പ് കൊണ്ടുവരുന്നതാണ്.

സ്‌കൂള്‍ കുട്ടികള്‍ക്ക് ക്വിസ് പ്രോഗ്രാം

ആയുര്‍വേദ ദിനവുമായി ബന്ധപ്പെട്ട് സംസ്ഥാനത്തെ സര്‍ക്കാര്‍, എയ്ഡഡ് സ്‌കൂളുകളില്‍ 8, 9, 10 ക്ലാസുകളില്‍ പഠിക്കുന്ന കുട്ടികള്‍ക്കായി ആയുര്‍വേദവുമായി ബന്ധപ്പെട്ട ക്വിസ് പരിപാടി നടത്തുന്നു. നവംബര്‍ മാസത്തില്‍ നടത്തുന്ന സ്‌കൂള്‍തല ക്വിസ് പ്രോഗ്രാമില്‍ വിജയികളാകുന്ന ഒന്നും രണ്ടും സ്ഥാനക്കാര്‍ക്ക് സര്‍ട്ടിഫിക്കറ്റും സമ്മാനവും നല്‍കുന്നതാണ്. ഇവരെ പങ്കെടുപ്പിച്ചു കൊണ്ട് ഡിസംബറില്‍ ജില്ലാതല പരിപാടി നടത്തി ഒന്നും രണ്ടും സ്ഥാനക്കാര്‍ക്ക് സമ്മാനവും നല്‍കുന്നതാണ്. ജനുവരിയില്‍ എറണാകുളത്ത് വെച്ച് നടക്കുന്ന ഇന്റര്‍ നാഷണല്‍ ആയുഷ് കോണ്‍ക്ലേവിനോടനുബന്ധിച്ച് ജില്ലാതലത്തില്‍ സമ്മാനാര്‍ഹര്‍ ആകുന്നവരെ പങ്കെടുപ്പിച്ച് സംസ്ഥാനതലത്തില്‍ ക്വിസ് പരിപാടി നടത്താനും മെഗാ സമ്മാനങ്ങള്‍ നല്‍കുകയും ചെയ്യും.

ആയുര്‍വേദ ദിനാചരണം മറ്റ് പരിപാടികള്‍

1. മുതിര്‍ന്ന ആയുര്‍വേദ ഡോക്ടര്‍മാരെ ആദരിക്കല്‍
2. വിവിധ ആയുര്‍വേദ ആരോഗ്യ പദ്ധതികളുടെ ഉദ്ഘാടനം
3. മികച്ച ആയുര്‍വേദ ആശുപത്രികള്‍ക്ക് പുരസ്‌കാരം
4. തീരദേശ മേഖലകളില്‍ സ്‌പെഷ്യലിറ്റി ആയുര്‍വേദ ക്ലിനിക്ക്
5. എല്ലാ സര്‍ക്കാര്‍ ആയുര്‍വേദ സ്ഥാപനങ്ങളിലും ജീവീതശൈലീ രോഗ ക്ലിനിക്കുകള്‍
6. പൊതു ജനങ്ങള്‍ക്ക് ആയുര്‍വേദ ജീവിതരീതി: ബോധവത്ക്കരണവും, പരിശീലനവും
7. ഔഷധസസ്യ പ്രദര്‍ശനങ്ങള്‍, ഔഷധ സസ്യ കൃഷി, പരിപാലനം, സംരക്ഷണം
8. വേദനാ നിര്‍ഹരണം, പകര്‍ച്ചവ്യാധി നിയന്ത്രണം എന്നിവയുടെ ആയുര്‍വേദ മാര്‍ഗ നിര്‍ദേശങ്ങള്‍
9. വിവിധ ആയുര്‍വേദ സ്‌പെഷ്യലിറ്റി മെഡിക്കല്‍ ക്യാമ്പുകള്‍
10. വിവിധ ജില്ലാതല ആയുര്‍വേദ പ്രചരണ പദ്ധതികള്‍, ബോധവത്ക്കരണ പ്രവര്‍ത്തനങ്ങള്‍.