കേരളത്തില്‍ നടിയെ തട്ടിക്കൊണ്ട് പോയി പീഡിപ്പിച്ച സംഭവം രാജ്യമൊട്ടാകെ ചര്‍ച്ച ചെയ്ത ശേഷവും നടിമാരോടുള്ള മനോഭാവത്തില്‍ സിനിമയിലെ പല പുരുഷകേസരിമാര്‍ക്കും മാറ്റം ഉണ്ടായിട്ടില്ലെന്ന് വിദ്യാബാലന്റെ വാക്കുകള്‍ വ്യക്തമാക്കുന്നു. അഭിനയിക്കാന്‍ അവസരം തേടിയെത്തുന്ന പുതുമുഖ നടിമാരോട് ആദ്യം കൂടെ കിടക്കാന്‍ ആവശ്യപ്പെടുന്ന പ്രവണത വര്‍ദ്ധിച്ചുവരുകയാണെന്ന് ഒരു ഇംഗ്ലീഷ് പത്രത്തിന് നല്‍കിയ അഭിമുഖത്തില്‍ വിദ്യാബാലന്‍ വ്യക്തമാക്കി. പല നടിമാരും അഭിമുഖങ്ങളില്‍ ഇതേക്കുറിച്ച് പരാതികള്‍ പറയുന്നത് പതിവായി മാറിയിരിക്കുന്നെന്നും താരം പറയുന്നു. 

അടുത്തിടെ ഇത്തരത്തില്‍ ഹൈദരാബാദില്‍ ഒരു നടി ബലാല്‍സംഗം ചെയ്യപ്പെട്ടു. തെലുങ്ക് സംവിധായകനും നടനും കൂടി ഒരു പുതുമുഖനടിക്ക് അവസരം നല്‍കാമെന്ന് പറഞ്ഞ് കാറില്‍ കയറ്റികൊണ്ടുപോയി. ഹൈദരാബാദിലേക്കുള്ള യാത്രയ്ക്കിടെ സംവിധായകനും നായകനും നടിയോട് ലൈംഗിക ചുവയോടെ സംസാരിച്ചു. എന്നാല്‍ നടി ബഹളം വെച്ചതോടെ കീഴ്‌പ്പെടുത്താന്‍ ശ്രമിച്ചു. അതിനിടെ കാറിന്റെ നിയന്ത്രണം തെറ്റി ലോറിയില്‍ ഇടിച്ച് നിന്നു. നിസാരപരിക്കുകളോടെ രക്ഷപെട്ട യുവനടി ആശുപത്രിയില്‍ ചികില്‍സയിലാണ്. വിജയവാഡ പൊലീസ് കേസെടുത്തതോടെ സംവിധായകനും നടനും വിദേശത്തേക്ക് കടന്നു. 

ഏത് സിനിമ ഇന്‍ഡസ്ട്രിയിലും ചില ലോബികളുണ്ട്. അവരുടെ കയ്യിലാണ് കാര്യങ്ങളുടെ ഏതാണ്ട് നിയന്ത്രണം. ഇവരെ ഭയന്നാണ് പല നടിമാരും മറ്റ് സാങ്കേതികപ്രവര്‍ത്തകരും മിണ്ടാതിരിക്കുന്നത്. മാന്യമായി പെരുമാറാന്‍ അറിയാത്തവരാണ് ഏറെയും. എന്നാല്‍ വളരെ പ്രൊഫഷണലായ ആളുകളുമുണ്ട്. അവരെ കണ്ടെത്തി ഇന്‍ഡസ്ട്രിയിലേക്ക് കടക്കുന്നതായിരിക്കും നല്ലതെന്നും വിദ്യാബാലന്‍ പറയുന്നു. എന്നാല്‍ പലരും എടുത്തുചാടി കുരുക്കുകളില്‍ ചെന്ന് വീഴുകയാണ് ചെയ്യുന്നത്. ചെന്നൈയിലും മുംബയിലും ഹൈദരാബാദിലും നല്ല പ്രൊഫഷണല്‍ കാസ്റ്റിംഗ് ഡയറക്ടര്‍മാരുണ്ട്, അവരെ സമീപിക്കുന്നത് നന്നായിരിക്കുമെന്നും താരം ഉപദേശിക്കുന്നു.