ഗെയിൽ വാതക പൈപ്പ് ലൈൻ പദ്ധതിക്കെതിരേ മുക്കം പ്രദേശത്ത് നടക്കുന്ന ജനകീയ പ്രതിഷേധത്തെ തുടർന്ന് സർക്കാർ വിളിച്ച സർവകക്ഷി യോഗത്തിൽ പങ്കെടുക്കില്ലെന്ന് ഗെയിൽ സമരസിമിതി. പദ്ധതി നിർമാണം നിർത്തിവയ്ക്കാതെ ചർച്ചയ്ക്കില്ലെന്ന നിലപാടിലാണ് സമരസമിതി. വ്യവസായ മന്ത്രി എ.സി.മൊയ്തീനാണ് സർവകക്ഷി യോഗം വിളിച്ചിരിക്കുന്നത്. തിങ്കളാഴ്ച കോഴിക്കോട് കളക്ട്രേറ്റിലാണ് സർവകക്ഷി യോഗം നടക്കുക.

ഇന്ന് വൈകിട്ട് സമരസമിതി നിലവിലെ സ്ഥിതിഗതികൾ ചർച്ച ചെയ്യാൻ യോഗം ചേരുന്നുണ്ട്. ഈ യോഗത്തിലാകും അന്തിമ തീരുമാനമെടുക്കുക. മുക്കത്ത് ഗെയിൽ പദ്ധതിക്കെതിരേ നടന്ന സമരത്തിൽ പങ്കെടുത്തവരെ പോലീസ് തല്ലിച്ചതച്ചത് വിവാദമായിരുന്നു. ഇതേതുടർന്ന് പ്രതിപക്ഷ നേതാക്കൾ മുക്കത്ത് എത്തുകയും സമരക്കാർക്ക് ഐക്യദാർഢ്യം പ്രഖ്യാപിക്കുകയും ചെയ്തു. സർക്കാർ പോലീസിനെ ഉപയോഗിച്ച് സമരക്കാരെ നേരിട്ടാൽ യുഡിഎഫ് സമരം ഏറ്റെടുക്കുമെന്ന് പ്രതിപക്ഷ നേതാവ് രമേശ് ചെന്നിത്തല വ്യക്തമാക്കിയിരുന്നു.