തോമസ് ചാണ്ടിയുടെ രാജി ഉറപ്പായെന്ന് ആന്റണി രാജു
ഗതാഗതമന്ത്രി തോമസ് ചാണ്ടിയുടെ രാജി ഉറപ്പായെന്ന് ഇടത്പക്ഷത്തിനൊപ്പം നില്ക്കുന്ന കേരളാ കോണ്ഗ്രസ് നേതാവ് ആന്റണി രാജു. ഒരു സ്വകാര്യ ചാനലിലെ ചര്ച്ചയിലാണ് അദ്ദേഹം ഇക്കാര്യം വെളിപ്പെടുത്തിയത്. മന്ത്രിയെ രക്ഷപെടുത്താന് സര്ക്കാര് ശ്രമിച്ചെങ്കിലും അദ്ദേഹം തന്നെ കാര്യങ്ങള് വഷളാക്കി. ഇതേത്തുടര്ന്നാണ് മുഖ്യമന്ത്രി പിണറായി വിജയന് അദ്ദേഹത്തെ ചേമ്പറില് വിളിച്ചുവരുത്തി ശാസിച്ചത്. ഇക്കാര്യം മാധ്യമങ്ങളില് വാര്ത്തയായപ്പോള് മുഖ്യമന്ത്രിയോ, അദ്ദേഹത്തിന്റെ ഓഫീസോ, മന്ത്രി തോമസ് ചാണ്ടിയോ ഇക്കാര്യം എതിര്ത്തിട്ടില്ലെന്നതും ശ്രദ്ധിക്കണമെന്നും ആന്റണി രാജു ഓര്മപ്പെടുത്തി.
ഇടത് മുന്നണിയെ സമ്മര്ദ്ദത്തിലാക്കാതെ തോമസ് ചാണ്ടി സ്വയം ഒഴിയുന്നതാണ് നല്ലതെന്നും ആന്റണി രാജു പറഞ്ഞു. മുന്നണി സംവിധാനം എന്ന നിലയില് മന്ത്രി രാജിവെച്ച് പോകുമെന്നാണ് സ്വാഭാവികമായി കരുതിയത്. എന്നാല് ഇനി രാജിയല്ലാതെ വേറെ മാര്ഗമില്ല. രാവി വെച്ചില്ലെങ്കില് മുന്നണി സമയോജിതമായി ഇടപെടും. എന്.സി.പിയിലെ നേതാക്കള് പോലും സ്വന്തം മന്ത്രിയായ തോമസ് ചാണ്ടിക്ക് അനുകൂലമായി രംഗത്ത് വന്നിട്ടില്ല. മുന്നണിയിലെ മറ്റ് നേതാക്കളും പരസ്യമായി എത്തിയില്ല. അതിനാല് എല്ലാവരും തോമസ് ചാണ്ടിക്ക് ഒപ്പമാണെന്ന് വിലയിരുത്തരുതെന്നും ആന്റണി രാജു ചൂണ്ടിക്കാട്ടി.
ബാര്ക്കോഴക്കേസില് മുന് മന്ത്രി കെ.എം മാണിക്കെതിരെ ഹൈക്കോടതി ക്യുക്ക് വെരിഫിക്കേഷന് ഉത്തരവിട്ടപ്പോള് , കോടതി ഉത്തരവ് അലങ്കാരമായി കൊണ്ടുനടക്കുമോ എന്നാണ് അന്ന് സി.പി.എം സംസ്ഥാന സെക്രട്ടറി കോടിയേറി ബാലകൃഷ്ണന് പ്രസ്താവനയിറക്കിയിരുന്നു. അതേ സാഹചര്യമാണ് ഇപ്പോള് മന്ത്രി തോമസ് ചാണ്ടിക്കെതിരെ ഉയര്ന്നിരിക്കുന്നത്. അന്ന് ജസ്റ്റിസ് കമാല്പാഷ ഉത്തരവില് സീസറിന്റെ ഭാര്യയും സംശയത്തിനതീതമായിരിക്കം എന്ന് ചൂണ്ടിക്കാട്ടിയിരുന്നു. ഇക്കാര്യം തോമസ് ചാണ്ടിക്കും ബാധകമാണ്. എന്നാല് പെട്ടെന്ന് അദ്ദേഹത്തെ രാജിവപ്പിക്കാന് സര്ക്കാര് തയ്യാറാകുന്നില്ല.
തിങ്കളാഴ്ച സി.പി.എം സംസ്ഥാന സെക്രട്ടറിയേറ്റ് ചേരുന്നുണ്ട്. അന്ന് തോമസ് ചാണ്ടിയുടെ കാര്യത്തില് അന്തിമവും ഉചിതവുമായ തീരുമാനം ഉണ്ടാകുമെന്നാണ് അറിയുന്നത്. കാരണം അഴിമതിയുടെ കറപുരളാത്ത തോമസ് ഐസക്ക്, എം.എ ബേബി, പി.കെ ഗുരുദാസന് തുടങ്ങിയവര് സംസ്ഥാന സെക്രട്ടറിയേറ്റിലുണ്ട്. അവര് ഗതാഗതമന്ത്രിയുടെ നിയമവിരുദ്ധ പ്രവര്ത്തനങ്ങള്ക്കെതിരെ ശക്തമായ നിലപാടെടുക്കുമെന്ന് രാഷ്ട്രീയ നിരീക്ഷകര് വിലയിരുത്തുന്നു. ഇക്കാര്യത്തില് ആന്റണി രാജുവിനും ശുഭപ്രതീക്ഷയാണുള്ളത്.
https://www.facebook.com/Malayalivartha
